儘管發展商同代理合力唱好樓市，仍有投資者對後市投不信任票，油麻地樓花盤窩打老道八號，二座高層A業主，二月以二百三十萬買入，奈何樓市回軟，近月該盤價錢有落冇上，於是趁入伙前，以二百二十萬蝕讓予醫護人員，蝕十萬九，半年貶值四點七巴仙，連雜費估計蝕近一成。
蘭西記得，窩八早前都出現過兩宗蝕讓，業主眼見二手放盤二百幾個，發展商又有一手貨尾，驚住下月入伙推埋出嚟頂爛市，惟有及時出貨，輸少當贏。
廣州國際玩具禮品城第一期計劃今季內購，長實袁添鴻話，接到意向書已經超額一倍八，認購總樓面一百八十萬呎，估計第一期可以套現近十億。
袁添鴻話，從收到嘅認購書睇，主要係玩具商，佔六成一，當中四成二屬於普通玩具公司。
準買家有六成半嚟自廣東省，可能因為佢哋最熟悉環境。香港客都有兩個巴仙，台灣客就佔三巴仙。
湖南長沙對港人嚟講，唔係好熟悉，不過，國中控股喺當地嘅國中星城第一期「萬國商業廣場」，最近推出首批二十七個舖位，四日內沽清。
買家主要係投資者，舖位一百六十一至六百四十六呎，售價逾十五萬至四十二萬，套現約千一萬。
發展商計劃加推三十個單位，一百四十六至五百四十七呎，售價十五萬餘起，最高八十八萬三。
由於銀行再度積極出貨，祥益邱家邦話，今個月頭二十日，屯門區已有三十宗銀主盤成交，比上個月同期大增近六成。
佢話，睇落銀主出貨潮仍然持續，因為淨係噚日，又有六單銀主貨成交咗。好似天盛苑C座一個八百零六呎單位，就減價七個巴仙，以六十五萬賣出。邱家邦話，銀主單位價格較私人住宅低五至八巴仙。
暑假近尾聲，預計投資市場又再活躍，資深投資者周南，剛委託仲記，標售土瓜灣譚公道四十五至六十三A地下E舖及閣樓A至J單位，共逾萬呎，連租約，下月十五截標。
呢件貨係大一時裝連鎖店老闆周南，喺九七年初以二千九萬購入，惠康以每月十四萬八租至明年底，早前放盤叫價三千二萬。聽聞，周南持有舖位近四十件，集中九龍區。
另外，中記有客趁熱鬧，推出尖沙嘴金馬倫道十七號地下A、B舖，千九呎，眼鏡八八和髮型屋共以十八萬九租至○六年，九月二十日截標。據悉，業主喺千禧年，以二千七百五十萬買入，市值估計逾五千萬。
近期積極幫中銀出貨嘅卓先，又替中銀標售上環易通商業大廈半幢，包括地舖及寫字樓共四萬呎，估計市值近億，九月十七日截標。
蘭西
電郵地址：