今年十七歲嘅岩佐真悠子雖然係人氣水着偶像，不過，岩佐就話鏡頭後嘅佢，其實同一般日本女高中生冇分別，佢重向日本雜誌《Friday》嘅讀者，公開佢平日放學後嘅生活。
岩佐真悠子雖然經常要幫雜誌拍性感水着寫真，成個大忙人咁，不過每日放學之後，岩佐同好多日本女高中生一樣，都鍾意走去涉谷玩。岩佐話鍾意涉谷係因為貪嗰度夠方便，喺109shopping完之後又可以去唱K，行到攰攰哋又可以走入快餐店食吓嘢。當日岩佐重以比堅尼上衣配超短熱褲行涉谷，引嚟途人嘅豔羨目光。
另外，岩佐重透露咗一個鮮為人知嘅嗜好，原來佢好鍾意玩cosplay角色扮演，屋企收埋唔少cosplay衫珍藏。所以當日岩佐一經過cosplay店，就成支箭咁衝咗入去，搵番套着吓，佢揀中套粉紅色戰隊制服，岩佐着咗套衫上身，十足十打怪獸嘅嬌俏女戰士。不過佢隱隱約約透出打底嘅圓點比堅尼，鬼咁誘人，相信唔使佢出手，啲怪獸都投晒降啦。