新一屆西甲聯周末就會展開，喺今個夏天簽咗八個球星嘅巴塞隆拿最受注目，但佢哋未必可以強陣出征桑坦德，球迷真係要小心。
巴塞喺簽入艾美遜後，諗住用佢拍佩奧爾坐鎮後防，點知佢哋收到國際足協通知，話艾美遜上屆喺最後一場聯賽被趕出場，要坐兩場波監；就算佢已由里昂過咗巴塞，停賽令仍然生效。
咁都未算，巴塞嘅鎮山之寶朗拿甸奴周一喺友賽整親足踝，可能要唞一個禮拜先好得番。聽講佢哋教練列卡特諗住用朗拿甸奴，拍伊圖同迪高攻桑坦德，𠵱家可能要諗過另一個攻擊組合。
咪話我求大俠唔提醒大家，巴塞雖則係大球會，但問題唔係冇，所以咪立亂舂個頭埋去。𠵱家離西甲聯正式開波重有幾日，不妨睇多幾日先至落注，無謂掉錢落鹹水海。
由利物浦過檔皇馬嘅奧雲除咗鍾意賭馬，亦好喜歡打枱波；佢喺馬德里一搵到樓，就會即刻從英格蘭搬張私家桌球枱過西班牙。聽講佢以前成日同利記班隊友篤波，但我求大俠知道皇馬班球員，包括佢同鄉碧咸同活基治，都唔太好呢項運動，睇嚟佢之後都係自己同自己打多。
喺歐國盃有出色表現嘅捷克前鋒軒斯，離開捷克俄斯特拉發返德國效力，同慕遜加柏簽四年。佢身價雖只係百五萬歐元，但因早年踢漢堡失敗而回，故德國傳媒唔太睇好呢單交易。我求大俠唔係咁睇，佢當年同漢堡唔妥兼年紀細未夠班啫，𠵱家大個仔，應該可幫自己省靚招牌。
前巴西國家隊隊長鄧加周一做咗英冠球隊昆士柏流浪嘅股東，點解佢會去英國搞波？咁就不得而知，但肯定就令流浪班球員士氣大振；佢哋主席包華話班球員好開心可以獲得鄧加欣賞，嚟緊一定會努力。流浪開季麻麻，四戰兩和兩負，我求大俠都希望呢個消息可刺激佢哋向上。
英超改例，停賽球員要即刻停；所以喺周一俾英足總秋後算帳，罰停三場嘅伯明翰中場沙維治噚晚冇份踢，球迷咪以為我哋畀錯資料。布力般中場巴利費格遜（同喺周一被禁停賽）踢唔到今晚場波，我哋能話到畀你哋知，但如有突發嘅，就要你哋自己執生上網睇。