坐的士，司機猛咁對住對講機，與行家傾偈，只聽到佢講。「唔好去嗰邊咯，不如去澳門啦，安全啲吖嗎。」再聽到幾句，先至知道司機話唔去東莞，約朋友過澳門玩。經過議員候選人「召妓」一役，警察又中招，一般人都無謂去東莞深圳尋歡咯。
女會計師瑪莉經常要上去東莞仄數，議員事件後，瑪莉如常去到東莞，中午與廠長及經理等人（全部男人）食飯。廠長大聲講：「唔係十個有九個，而係十個有十個，包括我在內，都有晒搵靚女嘅經驗啦，怕乜講啫，我老婆都知道㗎，如果公安要捉人嘅話，晚晚都拉幾百個，一千個啦，拉議員候選人，分明搞針對。」廠長咁坦白，瑪莉聽到面紅。返到嚟香港，瑪莉與朋友去睇「東宮西宮」，笑到碌地，但其中一幕，演員扮肥佬黎炒夥計魷魚，聲線似足肥佬，粗口亦一樣，性器官滿地。瑪莉聽到好唔自在，佢估唔到舞台棟篤笑話劇可以容許咁多句粗口也。但瑪莉雖然面紅啫，其他觀眾就反應唔錯，睇嚟編導林奕華、胡恩威對肥佬黎嘅動態好有研究，先至做得維肖維妙。
瑪莉聽完粗口，心裏好似有啲壓力，散場後出到藝術中心外面，打電話搵老友露比傾吓偈，露比原來身處澳門，住響近碼頭嘅酒店，預備出門去宵夜，露比講畀佢聽：「死火，呢度好多靚女講唔鹹唔淡廣東話，行來行去，唔知係唔係金沙開幕之後，走過嚟做生意嘅呢？舊年暑假我冇見到呢類人嘅噃，咦咦咦，我好似見到F公子上酒店房，唔……」名人之子本來冇人識，但上過周刊之後，就容易俾女士認得。各位男士千祈唔好同名女人行街，俾狗仔隊影相呀。