港股噚日早上牛牛皮皮，阿虎以為會悶足成日，點知午後大批資金流入狂掃中移動（941）及地產股，阿虎唔少經紀朋友接order接到手軟。恒指全日升214點，收報12646，成交近150億元。
阿虎初初以為係挾淡倉，不過黑客話今次係有資金流入將港股搶高，並非單純為結算而挾期指。據聞芬佬見到本港通縮結束，而阿董又話CEPA繼續有消息公布，加上樓價經過調整後再度上升，芬佬因而入市增持港股。噚日連一直受油價困擾的國泰（293）亦起飛，升4.15%，收13.80元，唔通對沖基金炒期油就快炒爆煲？其實油價逼近50美元已經是市場上最淡的消息，但市場都可以當冇到，相信好難再搵到其他更淡消息將大市質低，後市相信易升難跌。
國內爆出牛奶減價戰，蒙牛乳業（2319）在北京及成都減價14%迎戰同業競爭，但消息只令蒙牛昨日股價跌1%，收報4.875元。據講其對手減得相當狠，奶價減幅高達25%，若果減價戰持續，唔知蒙牛重可唔可以做一隻4元樓上的牛牛呢？
華潤萬眾（331）中期純利雖倒退27.5%，但卻息誘股東，派特別息13仙，由於招股書講明末期派息17仙，即全年派息高達30仙，以噚日收市價3.30元計，股息率高達9%，十分吸引，加埋副主席話想增持，今日股價應該有睇頭。
另外，國內砵砵車市場所面對的困難日益浮現，7月轎車產量較６月下降21.1%，統計局重話汽車企業今年首7個月利潤會倒退。摩根大通與一波聯手唱淡汽車股，一波重特別叫人減持華晨（1114）。
阿虎