今年立法會選舉可謂好戲連場，首先殺出個封咪嘅鄭大班喺最後一分鐘話要參選，跟住就係截止報名後，馬力自爆患上直腸癌。之後又有民主黨候選人陸續出事，何偉途被掃黃即時罰勞教半年，黃成智又指冇為員工供強積金，噚日涂謹申又話冇申報物業要追查。
咁睇嚟今年選舉遊戲叫做玩抹黑，因為親中陣營已預先張揚，搜集晒啲黑材料，準備排隊發放，務求打擊民主派嘅勝算。
另外，八方噚晚收到醫學會嘅聲明，批評左報《大公報》一篇，題為「勞永樂連任勝算高」嘅報道失實喎。醫學會話《大公報》冇訪問會長蔡堅，但竟然話蔡堅看高勞永樂一線，因為「勞永樂的政績深得業界的認同和讚賞」，實在深表遺憾，醫學會已經同選管會反映事件。《大公報》話一律唔回應。
又煲呔曾祭完祖由京返港，又繼續做政制諮詢嘅工作。但佢點都唔講，究竟喺北京有冇同喬曉陽講政改問題。
傳真︰2623-9278
電郵︰