港府噚日喺會展搞咗個「香港經濟定位高峰會」，董特首壓軸致辭，並獲得工總、廠商會、香港總商會、中總、中企協會同貿發局協辦，吸引八百多名商界精英及港府高官出席，一齊商討香港如何繼續背靠祖國，面向世界。
劉慧卿係少數有出席嘅立法會議員，佢雖然唔係講者，亦抓緊機會就政改問題發問，佢話香港經濟係咪同政治無關？點解港人最關心嘅政改問題，影響特區政府管治質素嘅問題，無喺大會上討論？主持大會嘅唐英年先將個波交畀講者之一嘅貿發局主席吳光正回應，吳氏話香港七百萬人同國內十三億同胞最終係希望能夠平穩繁榮地發展，但政改發展步伐一定要取得各方平衡。
唐唐跟住又迫另一講者滙豐銀行大班艾爾敦表態，大班話政改需要符合大眾最佳利益，絕唔可以話商界行呢個方向，政治行另一方向，所有人必須共同攜手合作，並與政府緊靠，咁樣至有利。
唐唐最後話，據調查顯示，本港市民最關心係經濟，其次係就業問題，唔清楚劉慧卿指市民最關心係政改嘅調查係嚟自何方。佢又話香港喺政改問題上唔容許有任何差錯，而有啲國家就曾經喺呢方面出錯過。三位講者回應後均獲得全場掌聲，令到卿姐好無癮。
（圖）劉慧卿（左）喺經濟高峰會度，同翁以登（左二）、盛智文（右二）及何秀蘭好似好好傾。
傳真︰2623-9278
電郵︰