身兼行會成員嘅工聯會會長鄭耀棠，係噚日「香港經濟定位高峰會」嘅講者，佢話香港面對嘅隱憂，係對國家缺乏認識喎。
佢舉例，指港府官員對國內嘅運作常規不熟悉，竟然用英文作為書信文字；重有，班立法會議員一樣搞唔清楚國內嘅官階，曾經有議員將中聯辦部長等同於中央級嘅部長，佢笑稱幸好冇當佢哋係酒樓部長。聽落好似諷刺緊早幾個月聲言去闖關嘅馮檢基，當時基哥話有部長級高官見佢哋，所以放棄闖關。
棠哥話重有嘅隱憂，就係香港有成一百三十萬名低技術低文化勞工，喺面對知識轉型經濟特別難搞；以及香港大學生比例偏低，連同受過培訓嘅人才計數亦只佔年輕人口四成二，比起上海嘅五成三同北京嘅五成二重要低。咁特區邊個搞教育人口政策？
另外，老董雖然不食人間煙火好耐，但係都要講番兩句立會選舉應吓景，佢話，希望新一屆立法會能夠支持政府，同政府緊密合作，以確保本港繼續繁榮發展喎，咁講還講，到時民主派大勝，唔知佢老哥會唔會真係同人合作。
傳真︰2623-9278
電郵︰