最近PS2上有唔少中文化遊戲推出，轉用中文對一般動作遊戲幫助同影響都不大，不過講到包含RPG元素嘅遊戲，對唔識日文嘅玩家可謂有決定性影響。以往玩《櫻花大戰》，因為畫面實在吸引，總要無奈地拎住攻略嚟玩，不過下個月推出嘅《櫻花大戰VEpisode0：荒野的少女武士》，已經全面中文化，對遊戲故事更易理解，真正可讓玩家掌握遊戲內所有決定。
記者：許福合
今集《櫻花大戰VEP0》其實屬《櫻花大戰V》嘅前傳，前作去過東京同巴黎之後，將場景移到了1927年嘅美國西部，風格可謂大逆轉。而《櫻花大戰VEP0》中嘅女主角為德州牛仔少女潔蜜妮．桑萊茲擔正，相較之前嘅真．宮寺櫻同Erica，新女角多一分陽光氣息同粗獷感。新作由藤島康介及RED原班人馬製作，可算為正傳故事鋪路之作。
還記得從《櫻花大戰》第一代開始，玩家已可操作3D機體，同時亦具備模擬戰鬥系統，《櫻花大戰VEP0》將會更加強調動作戰鬥部份，玩家將騎上白馬，與敵人展開戰鬥。遊戲一開始就令筆者覺得操控相當唔錯，尤其視點轉換更令人覺得得心應手，因為鏡頭總能令玩家輕易決定攻擊位置，即使要走回頭，一按L2鏡頭又會走回背後，唔使特別花時間就可以玩到好純熟。
而場景變化之多，更能充份發揮人馬合一嘅移動力，用馬鞭打一下白馬，就會短暫加速，配合跳躍能力，就好似化身為美國牛仔一樣。
由於今集以動作玩法為主，故此喺戰鬥上亦較多變化及道具。如戰鬥時，起初雖然只有一把劍，不過亦好有睇頭，除非你選擇難度最高開始遊戲，因為配有良好視點，擊中敵人成功率可達8成以上，算係頗為有效嘅攻擊。遇到一大班敵人圍攻時，除咗逃走外，更可使出一招有限嘅必殺技，一次過將大量敵人擊倒，唔怕身陷險境。
遊戲初期最難應付，係一種會使出防護傘嘅敵人，要花唔少時間應付。每次過版後，都會獲得一定SP，甚至有新嘅武器道具，可用作提升自己戰鬥力，好好決定升級項目，對付下一版敵人就會變得更輕鬆。
《櫻花大戰》嘅特色，係會配合豐富遊戲劇情，今集雖屬外傳作品，不過都有唔少對話出現，各路人物經常跑出來說話，因為跟PS2版《熾熱血潮》一樣用上全中文介面，面對複雜多變嘅LIPS對話系統都唔使驚，免致揀錯傷害同伴嘅對白。登場角色同人物依舊豐富，感覺上一如過往般熱鬧，同玩日文版有好大分別！
舉個關於LIPS對話系統變化嘅例子：見到一個少女被一班惡人圍住向你求救，你就可選擇救人或逃走，筆者當選擇救人，之後就難免一場惡戰！不過好人通常有好報，救人過版後，就獲得一把新劍，所以路見不平拔刀相助，係有好報嘅！
PS2於今個暑假為香港機迷帶來五款全新中文新Game，現凡於指定店舖購買任何兩款最新之中文遊戲，即送你今夏至Cool嘅靚靚T-Shirt一件！個個月款式唔同，珍藏價值極高。送完即止。
遊戲類型：動作
對應機種：PS2
遊玩人數：1人
開發商：SEGA/Red
推出日期：9月22日
行貨售價：$395
(c)SEGA,2004CHARACTERDESIGNCRED
