我求大俠噚日坐巴士，聽見人談論前晚阿仙奴對「米堡」場波，又係嘅，場波峯迴路轉又多波入，睇嘅過癮，買咗入球大細「大」嘅就更滿心歡喜。阿仙奴贏波可喜，但係一場波失三球亦係警號。唔知領隊雲格經此一役會否買後衞，否則以呢隊波攻力強時守有隱憂，吼住博「大」實無甩拖。
有數得計，「兵工廠」阿仙奴連埋社區盾同兩場聯賽，三場波入球都開「大」。睇佢哋前線火力咁猛，但後防又唔多穩陣，怕且會促使雲格喺轉會市場關閉前斟人，傳咗一陣子嘅查比斯係不二之選。
阿仙奴嚟緊禮拜三主場對布力般，客軍屬性又係有前無後，斷估又係另一場「入球騷」。家陣馬會足智彩開「大」得嗰一點六倍，開盤嘅明顯有戒心，但有心者早買有着數。
迪肯尼奧一返拉素就新聞多多，例如話佢不滿超級盃踢後備（雖然佢例牌否認），而日前佢又高呼球會應該增兵。老實講，如果拉素係有心逐鹿中原，又點會放走咁多主將，亦唔會收容佢同埋甸奴巴治奧呢啲「殿堂級」球員啦？迪肯尼奧都係做番自己本份，踢好啲波先嘞。
女子沙灘排球員衣着性感，打波時意態撩人，難怪沙排係奧運其中多人追捧嘅項目。羅馬王子托迪奧運期間最留意唔係班羅馬師弟喺足球賽踢成點，而係吼實沙排賽。話就話意大利沙排嘅柏露達係佢老友嘅太太，捧場應該，但托迪睇得咁入神……，因住女友扭耳仔至好喎。
法甲冠軍里昂嘅巴西前鋒艾巴，喺周日聯賽作客對梅斯時斷腳，今季玩完，前場人腳得番高禾！算好彩嘅係，距離轉會期完結重有個零禮拜，記得艾巴及摩連迪斯等高質鋒將，上季就係喺最後時刻空降法甲，即管睇吓里昂今年又搵到乜好嘢返嚟幫手打聯賽及歐冠盃！
每逢有「星」加盟，皇馬官方網站都會同球員做專訪，其中一條問題，就係要活基治自我介紹畀啲佢嘅新支持者認識，咁活基治就答今年二十四歲、曾經踢過列斯同紐卡素任中堅。我求大俠覺得就算做完專訪，皇馬球迷都唔多識佢，想提高喺西班牙知名度，最實際都係踢好波！