潮界不死鳥「魯祖宗」年輕有為，年屆四十但仍一身最潮打扮，身穿可愛猿人MiloT恤，配以「道樂」大字牛仔褲，加埋頸上的BeamsBoy毛巾，襯埋面上一副煞食的佐佐木粗框眼鏡，可算最傑出「潮中人」（潮爆中年人）。祖兄近排泊咗DJ葛碼頭，兩人聯手搵食，四出拍老細心口搞嘢，風頭一時無兩。最近唔記得睇電視定報紙遇啱有佢嘅訪問，講自己收藏勞力士心得，阿祖眉飛色舞講述花唔少錢儲咗幾隻古董勞，重晒冷自己嘅歷年收藏；原來訪問背後別有文章，口痕友話訪問裏面啲表，其實係阿祖由古董表舖借番嚟當自己擁有。問祖兄是否真有其事？佢笑得非常親切而且相當迷人話：「咁都畀你八到？的而且確批古董勞係我做表舖個Friend借畀我，因為我自己啲勞鎖晒喺保險箱唔得閒去攞，咁個記者Friend話趕時間想訪問我，咪幫人幫到底去表舖借批古董勞頂住檔先囉！大家千祈唔好諗多咗呀！」講真句，呢啲事實在好平常，阿祖只不過為咗幫朋友搞好個訪問至咁做，過去好多潮人名家為咗博出鏡都會問人借名牌影相，講到底都想為件事好啫，大家千祈咪諗多咗呀！
主持人：大食Jack
八卦熱報：