鬼才添布頓嘅電影一向充滿陰暗感及黑色幽默感，連本來開開心心嘅布公仔電影都走唔甩，《怪誕城之夜》效果卻出奇地好，絕對可引入經典之作。事隔幾年，遊戲商仍念念不忘呢款咁有Character嘅作品，推出PS2動作版《怪誕城之夜》。 記者：徐影龍
呢隻《怪誕城之夜》由CAPCOM製作，可謂信心保證，全Game氣氛編排極之陰暗，玩法以動作為主，邊行邊打，再配以全新嘅劇情，Jack嘅Fans肯定過足癮。遊戲版故事屬全新編寫，緊接住電影版《怪誕城之夜》之後。壞蛋Oogie趁住Jack出外時，聯同一幫手下再次搗亂怪誕城，使到居民苦不堪言，Jack返到嚟當然唔會就咁算數喇，一場大戰在所難免。
遊戲系統唔算複雜，都係邊行邊打，應付吓Boss咁，較特別係Jack嘅攻擊模式，全靠手上一堆綠色黏狀物體，隨時變成長鞭或大錘攻擊敵人，最搞笑係將敵人黏住再撻出去，一口氣解決一堆敵人。值得一提係Jack重識得變身，每個變身都有唔同能力，如火燄南瓜Jack就可噴出強力火燄，消滅冰系敵人，又或變身聖誕老人Jack，以冰凍魔法攻擊火燄系敵人等，十分之有RPGFeel。
相關網址：
