上星期五講「五步一竇」，刊出後，中貿林晨早就收到電話，原來佢啲朋友睇到《GG細語》，以為佢知道好多上海「私竇」料，中貿林大呼冤枉，因為佢行走江湖多年，知道陷阱處處，邊會搞嗰味嘢吖。
何銘思喺《信報》寫番禺南沙書記梁柏楠貪污好賭腐敗，下下與霍英東抬槓，睇到我哋驚心動魄。何銘思引述霍英東：「就算你有億萬家財，一個公章就可以令你破產。」公章威力，在中國大到出奇，財務伍於一九九九年為客戶做財務顧問，到上海接收一間香港破產公司嘅合資企業，為咗個公章，俾上海佬（合夥對象）搞到冇晒符，惟有暫時求和，請上海大哥到虹橋歌廳唱K，歌廳內好多貴賓房，房內好多靚女陪唱歌，上海大哥邊唱邊摸，財務伍就正襟危坐，老闆入嚟打招呼招待貴賓，見到財務伍成個悶蛋咁，對佢講：「老細，呢度啲小姐係東北、四川落嚟嘅，好新鮮，佢哋熟習呢一行當熱身，成熟之後，就會去澳門，變成老女就去東莞、深圳搵最後一站錢，呢度你可以飲吓新鮮湯先喎！」
內地靚女職業生涯流程，大概如此，當然唔會係一成不變，大企業家以前去廣州傾大生意，領導帶佢去一個後宮佳麗三千嘅「鐵竇」，叫啲揀過嘅靚女埋嚟，對大企業家講：「你肯寵幸邊個，係佢嘅榮幸。」大企業家本來已經色迷迷，聽到共產黨員講呢句王侯將相之言，打個冷震，清醒番晒，一味推話自己血壓高，食咗血壓藥，搞唔掂。
商界人士都以為拘押議員候選人係個大笑話，搵戲嚟做，執得咁嚴嘅話，如何銘思筆下梁柏楠一類嘅官員，沒戲唱了！