日本性感女星仲根霞，早前為日本漫畫雜誌《YoungSunday》拍攝寫真，秘密嚟咗香港。上期嘅《YoungSunday》已經公開咗部份霞女嘅靚相，不過一眾男fans梗係覺得唔夠喉啦！所以今期《YoungSunday》徇眾要求，再次刊登一批未公開嘅霞女靚相，大部份都係喺香港著名嘅街道拍攝，連本地fans睇到都覺得有親切感啦！
仲根霞早前靜靜雞嚟香港拍攝寫真時，除咗喺佐敦吳松街一帶取景之外，原來佢重去咗好多唔同嘅地方。霞女首先去咗好多外國遊客必到嘅中環石板街度拍攝，身穿七彩橫間tubetop牛仔褲嘅霞女，依起棚牙笑到見牙唔見眼，搵佢做香港旅遊大使就啱晒。跟住霞女失驚無神走咗上去一幢大廈嘅天台上面影相，勁有《無間道》feel！
行到攰攰哋，霞女返番去間五星級酒店度唞下，順便擺番個招牌甫士，影輯靚相益街坊！除咗睇香港靚景之外，霞女重試咗唔少嘅香港地道美食。霞女就話最鍾意食雲吞麵，重以僅有嘅廣東話大讚好味㖭！