恒指升54點，睇姓李嗰系股份表演，包括電盈（008）在內。和黃（013）、長實（001）同電盈，佔咗恒指36點升幅。
交投有咁上下，升幅最大嘅係電盈鎖定回報輪9762，由6.2仙飛上10.4仙，升幅68%，捧場客一夜富貴。隻輪嘅實際數據，要上比聯網（www.kbcwarrants.com.hk）至知道。
隻輪10月初夠鐘，有效槓桿率4.4倍，溢價則係3.8%，個網列明揸隻輪嘅打和價係5.55元，引伸波幅38%。正股三兩毫子上落閒過立秋，隻輪亦隨時有唔細嘅波幅。
中企C輪：國企指數跑輸大市少少，唔見16點，跌幅0.4%。中電信（728）與人保（2328）分別跌兩格同7格，共跌16點，包起晒國企指數跌幅，其他國企平均冇郁，喺度整固中，遲吓再升過，諗定啲中企指數C輪，有平貨則收集。
中企指數C輪，用嚟炒，主角係9948，10月尾到期，輪價5.4仙，溢價6.8%，槓桿率21.2倍（有效9.7倍），引伸波幅35%。計溢價，唔講得吸引，所以只啱炒炒吓。睇數據，9984實在得多，11月尾到期，輪價13.6仙，溢價1.6%，槓桿率7.1倍（有效5.6倍），引伸波幅34%，衰在交投靜。
中信C輪：油價有聲氣回落，航空股硬淨，中信泰富（267）有航空業務成份，吼C輪玩吓，對象係9139。隻輪喺10月尾到期，輪價32仙，負溢價0.9%，槓桿率5.9倍（有效5.3倍），引伸波幅35%。
章盛