已故歌星羅文跑馬地蟠龍道九號故居近排賣出，單位二千呎，連天台以九百萬元成交，每呎四千五。
兩年前肝癌逝世嘅羅文，間屋由佢家姊繼承，去年開始放盤，當時市道麻麻，市值大約五六百萬。不過，代理透露，羅文家姊叫價硬淨，去年中樓市咁差，有客肯出市價洽購，佢不為所動，到今年個市好番，再有客出價八百萬以上，佢都唔賣，重將個價提高到九百五十萬，到近日，最終以九百萬成交，相對羅文八八年購入價二百八十八萬，賺逾六百萬，超過兩倍。
羅文係陪住好多人成長嘅一代巨星，佢嘅專業精神，係唔少後輩嘅學習對象，雖然唔知道佢個故居新買家係咪佢歌迷，但係能夠擁有並保留巨星嘅物業，應該別有一番意義。
地產代理舖櫥窗，一向用彩色噴墨打印機，製作樓盤內櫳或者景觀相，所耗打印機墨水，一個月開支可以成萬。
有見及此，中記青衣城分行出新招，買部等離子顯示屏，不斷播放二手單位內櫳相片或者短片，甚至新盤宣傳廣告。
中記麥成輝話，plasma、電腦加軟件，總開支都係五萬幾。區內居民、商場途人以至行家，感到非常新鮮。分行獨家盤亦多咗，加上短片同照片，都係員工自己拍，促進合作之餘，又有成績，員工士氣高漲。
周身刀嘅富豪酒店太子女羅寶文，畫畫、寫詩、填詞樣樣掂。蘭西上次介紹過，富豪海灣嘅廣告歌，由太子女填詞，噚日參觀由佢親自設計，啱啱完成工程嘅示範單位，屋入面唔少壁畫同屏風，上面嘅圖案都係寶文嘅大作，其中一幅，掛喺睡房嘅畫，重有由佢寫嘅詩。
除咗畫畫同寫詩，寶文重好有野心，開拓另類市場，生產啤酒，旗下嘅富堡啤酒，好快推出市場。想先飲為快，暫時只有富豪旗下酒店有供應。佢重計劃，遲啲進軍健康食品行業㖭。
新地計劃喺全港最高建築物國際金融中心二期，搞國慶睇煙花。國金喺正海邊，佔盡地利，新地國慶當晚，安排六十八樓畀新地會會員，居高臨下欣賞氣勢磅礡嘅煙花表現。
不過，會員有成十九萬，新地擔心反應太踴躍，所以會抽籤，名額百六個。下個月十四號前，透過電郵或電話登記，抽中者當日可帶同三位親友去現場睇煙花。
政治同經濟關係微妙，世紀21深明此道，大埔翠屏商場分行周末開張，請嚟自動連任立法會漁農界議員嘅黃容根剪綵，聯同集團董事鄧慶年切燒豬。
過往代理新舖開張，多數請藝員或者發展商剪綵，請議會中人好少有，不過，身兼大埔區議員嘅黃容根，重要係民建聯嘅陣營，新界東向來都有好強嘅親中勢力，為咗做多啲地區生意，有道理。
蘭西
電郵地址：
