政府又搞舊意思，開咗個「經濟定位高峰會」，由唐唐同阿董等齊齊訓話，一致睇好前景，一個話通縮期就快結束，反而要驚通脹，另一個就話，要「背靠祖國，面向世界」，國家支持香港，就快又有好消息。
首先，通縮期真正結束未冇人知，反而會有通脹？即是話一個細蚊仔瘦到長期營養不良，𠵱家醫生話：好嘢，就快有麵包嚟嘞，你有得食嘞，不過就要小心消化不良，要諗定點樣減肥喎，使唔使我教定你纖體呀？咁樣講，係咪有少少變態呢？
個經濟搞到咁，餓足咁耐，望都望有通脹喇。至於「背靠祖國，面向世界」，咁就重好笑，香港啲食水生豬，由大陸運來凡幾十年，一向都係背靠祖國。不過可惜近七年來，香港已經移咗位，乜都扯阿媽裙邊，同成個世界脫節，變咗「背靠世界，面向祖國」。
「背靠世界，面向祖國」，反而有運行喎，因為正如李光耀話頭，香港唔係一個獨立國家，要顧及祖國十三億人民情緒。若然唔係面向祖國，又點可以全天候揣摸祖國面色，至於用個背脊向住世界，呢樣亦冇乜壞，因為帝國主義勢力聽講時時想顛覆中國，若果香港個背脊刺住「精忠報國」四個字，咁咪可以嚇走啲英美勢力囉。
不過就算呢一句，行政會議之內亦好似有人唔啱聽，工聯會嘅棠哥，喺同一個會議，竟然有少少唱對台，叫政府某啲人唔好太過倚賴中央。
咁就唔明嘞。背靠祖國、倚賴祖國支持，係啱定唔啱呢？祖國遲啲又有多啲支港好消息公布，係咪反為害咗香港呢？照阿董嘅立場就係啱，照棠棠咁講就係錯，咁香港人咪唔知應該信邊個？
空話經已講得太多太多，多到都冇晒反應。經濟點樣定位？乜唔係一早就定咗位咩？高科技港、中藥港、物流金融港，今時今日至傾定位，咁過去七年又係乜呢？
（圖）唐英年出席香港經濟定位高峰會，同八百多名商界精英及港府高官一齊討論香港點樣繼續「背靠祖國，面向世界」。
傳真︰2623-9278
電郵︰