細價股持續冇運行，噚日出現一隻名不經傳的股仔中大娛樂（8167），搞件笨豬跳事件。由於隻股跌幅高達九成幾，實在令人心動好想走去博反彈，但經紀陳急急喝住小初，話隻股一來係創業板股冇主板咁值錢，二來亦唔聽到有大炒家落場接貨，所以睇唔到有條件玩反彈，不如慳番啖氣好過。
中大娛樂昨日最低見3.5仙，收4.7仙，跌幅高達94％，成交股數有2.01億股，金額1036.5萬元。
經紀陳話，早在舊年都已經聽到有行家話有炒家想開戶口借錢，炒作呢隻股票，估唔到搞完一大場，最終都係大插水收場。
既然係咁，小初惟有繼續留意有實力嘅股份，好似深受大陸自由行同胞歡迎，幾乎係必到的勝地嘅莎莎國際（178），最近又獲外資大行推介，認為同胞繼續來港消費的話，莎莎嘅生意繼續有增長。
查實莎莎今年頻頻開新舖，擺明係想繼續食住自由行呢條水。雖然近期地舖租金上升，但估計業務增長可以抵銷呢方面開支，尤其係莎莎手頭持有幾億銀現金，實在唔使擔心佢哋嘅資本投入。
慕容小初