張玉珊做老闆嘅修身堂搵過唔少女星做代言人，而李蘢怡係其中一個。噚日張玉珊喺尖沙嘴宣傳中秋健康月餅，主動講話同李蘢怡合約今個月屆滿，唔會再續約，原因係唔認同李蘢怡經理人張承勷嘅處事方式，而且凡係張承勷旗下嘅藝人，短期內都唔會合作。
問張玉珊係咪李蘢怡經理人畀唔到期做宣傳？張玉珊就話：「乜你覺得李小姐好多嘢做咩？」又問到張玉珊知唔知張承勷旗下有乜藝人？張玉珊好寸咁話：「唔知邊個咁唔好彩啦！我咁多代言人，多一個唔多，少一個唔少。」
電話訪問番張承勷，佢就話有傾過續約，重係用舊價傾新約，除咗纖體之外，重有兩個新產品，其中一個係靈芝產品，拍廣告之前一日先知要性感，最後冇拍到。
而李蘢怡就喺電話回應話：「我知呢件事，呢啲係公司立場，冇法控制，我多謝張玉珊帶畀我好多機會，冇佢我冇咁多人識。」
薛凱琪噚日到商台接受訪問，佢以一身大肚婆長裙出現，重戴埋副眼鏡，搞到馮仁昭差啲唔認得佢。前日佢出席港台活動時玩一字馬唔小心走光，當時佢就賴係港台事前冇通知要玩呢啲活動，但港台就話之前已經通知晒所有歌手，薛凱琪噚日又即時轉軚話只係大家溝通上嘅問題，唔通薛凱琪驚得罪港台，影響到年尾新人獎嘅結果？
英國音樂人艾頓莊（EltonJohn）原定於下個月十三日喺香港會展舉行演唱會。由於演唱會器材嘅運送日期出現問題，預計未能如期由直布羅陀送抵香港，所以艾頓莊嘅演唱會順延一日去到十四號舉行。主辦單位話𠵱家提供退票服務，詳情可致電29228288。
鍾楚紅自息影後就過住少奶奶嘅生活，噚日大班記者喺中環Headquaters髮型屋等緊近排嘅紅人JackyMa之際，忽然見到紅姑一身闊太嘅造型出現，似乎啱啱買完衫，佢見到咁多記者都不禁問一句：「等緊邊個呀？」記者問佢識唔識JackyMa，有冇畀佢剪過頭髮，紅姑一聽「剪髮」就好驚咁款，唔出聲咁快步走咗去。
葉璇同江嘉良𠵱家重身在雅典代表無綫採訪奧運，不過近日喺網上就流傳一條江嘉良以手撞葉璇胸部嘅片段，江嘉良啱啱擰轉面，但唔為意葉璇喺後面，結果手踭批到葉璇個胸部，噚晚馮仁昭打畀身在雅典嘅葉璇，佢話：「冇咁嘅事，唔知係咪角度問題影響啦！」
