新加坡國父李光耀，評論中國、香港及亞洲事務，一向都好慧眼過人。今次佢話：新加坡嘅優勢，經已超越香港，因為新加坡係一個獨立國家，而香港就挨住大陸，要照顧住十三億中國人嘅情緒。
李光耀冇講錯。香港梗係要照顧住十三億人嘅情緒，例如台灣有官員過港，特區政府好多時都唔敢批出簽證，中國話攻打台灣，特首從來唔會講兩句嘢，話港台之間有密切嘅經貿文化關係，香港人樂於見到台海繼續和平。冇錯，中國有「自由行」照住特區，不過特區各個景點，就要加設埋普通話、簡體字，照顧自由行遊客情緒，慌住唔識講普通話，就俾人狂轟話唔係「中國人」。
新加坡係獨立國家，所以人哋放膽行英語教學，坡佬啲英文好過香港仔，呢樣就係人都知。係特區政府咁戇居，以為回歸祖國，就要照顧十三億中國人民情緒，嗱嗱聲推行所謂「母語教學」，點知人哋上海北京嘅高幹仔女，個個爭入「國際學校」同埋爭出國。
李光耀好嘢，一眼就睇出現時特區先天不足、後天失調，根本冇能力實行「高度自治」。呢個政府嘅自信經已冇晒，七年來搞到一鑊泡，𠵱家又名正言順咁宣布有中國CEPA自由行輸血，呢一樣係香港嘅「優勢」㖭。即是好似一個敗家仔，揸住億萬富豪阿爺嗰張附屬卡，周圍咁揚，話自己使錢大把「優勢」。
李光耀講嘢，特區政府有乜好回應？盞愈回應愈出醜啫。李光耀唔係美國國務院發言人，講嘢一向都中肯喎。人哋當年抨擊彭定康，中國都話佢講得啱喎，證明李光耀言論唔係親英親美，而係以一個亞洲國家元首身份所講嘅中立觀點。
阿董話過佢最崇拜李光耀，李光耀講嘢，就梗係世紀金句，特區政府咁都頂唔順？連阿董嘅偶像講嘢都敢駁嘴，特區政府內部有人係曲線反董，定係呢個政府及城市真係已經無可救藥？正所謂「有則改之」，使乜咁氣急敗壞？夠膽就叫鄔維庸曾憲梓等出嚟指住李光耀個鼻謾罵一輪？睇怕佢又冇膽喎。
傳真︰2623-9278
電郵︰