自從細價股冇運行，紅籌國企又唔多掂之後，小初好多經紀朋友都話搵唔到股票炒賣及冇生意，日日坐喺度拍烏蠅，如果唔係藍籌股重有些少成交，睇怕唔少經紀都要轉行。
不過經紀黃就話唔使太悲觀，佢話好多中資股仍然值得留意，好似上周五公布中期業績的兗州煤業（1171），就獲分析員一致唱好，前景並唔係睇得咁淡。
兗煤上周五公布截至今年6月底止中期業績，股東應佔溢利12.24億人民幣，比舊年同期上升65.9%。經紀黃話，證券界估計，兗煤下半年增長仍然好勁。
經紀黃又話，單睇新聞話大陸唔夠電力供應，就估到煤炭需求有幾勁，煤價上升係令兗煤業績強勁的原因，雖然阿爺早排頒落一個臨時措施，唔畀煤價上升得太勁，但好彩兗煤有出口業務撐住，所以點計兗煤下半年業績都唔會差，唔應該同其他國企股相提並論。
兗煤上周五股價冇起跌，平收8.40元，成交股數824.9萬股，金額6870萬元。公司稍後將與投資者及分析員會面，估計唱好報告將陸續出現。
慕容小初