今個月開幾個新盤，樓市有番生氣，代理行收入比上個月明顯多咗，好似中記，頭十九日淨係住宅部佣金，已逾六千三萬，激增六成二。
中記執董陳永傑，見氣勢咁好，就出戰報，搞比賽激勵士氣，叫前線「每人多行一步，盡量食到盡」。
執董話，比賽設營業額與宗數兩個大獎，分單月及季度計算。若分行單月營業額達八十萬，或促成二十四單生意，該行經理就可以攞到最高千五蚊獎金同金牌。
第三季累積生意百八萬，或促成七十二宗成交嘅分行，可以額外多五千蚊獎金。
樓價喺舊年「沙士」後大幅反彈，好多小業主都趁機鬆綁，但部份屬於「投降」離場。
蘭西最近聽到個真實故事，話有個年輕人，幾年前借政府錢上車，買入二百零萬市區單位，今年開始要還政府錢，計過條數，發覺唔係好掂，諗咗一輪，終於忍痛壯士斷臂，蝕咗幾十萬，重無端端孭上一身債。
聽講，原來都有幾多後生仔，好似上述嗰位咁樣上車。「便宜莫貪」呢句話，真係冇錯㗎。
投資物業，如果揸耐啲，通常可獲厚利。利記陳延春話，一名長線投資者，剛以市價二百四十六萬，沽出藍田滙景花園四座低層七百八呎E，十一年賺七十四萬，唔算好吸引。
不過，計埋期間收租，利潤共百五萬，幾乎賺一個對開。
滙景一度係熱門炒盤，二手活躍，個投資者持貨十一年，夠耐性。
富豪國際太子女羅寶文，諗出好多新構思，促銷赤柱富豪海灣。蘭西上個禮拜提到，佢幫富豪海灣電視主題曲「LoveParadise」填詞，由藝人陳慧琳主唱。蘭西搵到歌詞，讀者可以先睹為快。
另外，寶文之前幫富豪海灣設計幾個示範單位，今日又有一個開放畀傳媒睇。呢個D19號示範屋，以「東方浪漫」做主題，糅合印度與西藏文化及藝術色彩。羅小姐果然多才多藝。
蘭西
電郵地址：
