梅艷芳去世後，梅媽媽經常呻窮，但昨日阿梅生前的保險經紀連炎輝透露梅媽近日買了新樓，梅媽承認之餘卻質疑年初取到阿梅的保險金只得一百九十萬元，認為「普通人買保險都唔止買呢個數」，故寧願借錢換樓，亦賭氣不用阿梅的保險金。
十月十日是已故歌手梅艷芳的生忌，梅媽覃美金正計劃十月八日在尖沙嘴海洋皇宮筵開一百席齋宴，籌得善款將捐贈大嶼山寶蓮寺。
另一方面，「梅艷芳『四海一心』慈善基金」昨日於奧海城舉行籌款活動，並邀得譚詠麟、草蜢、官恩娜、三位出爐港姐及一批新晉歌手到場，即場義賣十七款阿梅肖像珍藏郵票及售賣於下月二十五日舉行的千人盆菜宴慈善晚會的門券。
阿梅生前的保險經紀連炎輝昨日亦有到場支持義賣活動，問他可知梅媽未收過信託基金每月十萬元的生活費，他說：「可能信託方面未畀錢佢啫，政府𠵱家有個會計師幫佢跟進緊。」
對於梅媽經常投訴不夠錢用，連炎輝即說：「乜呀？佢冇同我講過，不過佢𠵱家重買多咗層樓，喺同一條街隔籬嗰棟。」
「我買都多過呢筆」
梅媽得知連炎輝指她新購了物業後，在電話中勞氣地說：「佢話我有錢呀嘛，我就話畀你聽我點有錢法。新年時我攞咗阿梅嘅保險金，條數係一百九十萬左右，唔夠二百萬。一個普通人買保險都唔止呢個數啦，我自己買嘅金額都多過呢筆數。」
梅媽自言是按舊樓套現後再買新樓，她說：「點解連炎輝淨係講我攞咗保險金，又唔講個銀碼出嚟呀？我專登開咗個新銀行簿，一毫子都冇使，我借錢按樓都唔會使呢筆錢，我將來會公開銀行簿，證明阿梅嘅保險係得咁多。」
至於買樓的原因，梅媽表示是想轉換環境，她說：「我對面層樓賣咗四百幾萬，即係話我呢層樓值四百幾萬，我之前按咗呢層樓套現，用嚟做首期，喺跑馬地買番層四百幾萬三房一廳嘅舊樓。我唔可以搬得細，因為要留間房擺阿梅啲嘢，我會搵人幫我擇個吉日先至搬。」
問梅媽一個月支出五萬元是否足夠，她說：「梗係唔止啦，𠵱家我要供兩邊樓，淨係供樓都幾萬，重有兩個工人一個司機，我諗住賣咗呢度，但我要搬走咗先可以放盤。」
工人司機陪左右
梅媽續說：「個司機係以前阿梅請落嘅，佢話我出出入入都要車，阿梅嗰陣又話我有心臟病，叫我請個護士，但護士好貴嘅嘛，所以我請咗個工人跟住我，幫我袋住啲藥。」
採訪：張止寒、王崇穎 攝影：仇志德
