有關李麗珍同髮型師JackyMa及馬太呢段三角孽情嘅新聞，真係好似出爐麵包咁日日新鮮。繼馬太自爆今年初曾經想跳樓輕生後，噚日馮仁昭又收到風，話嚟緊有傳媒又會爆料，話阿珍原來曾經搵一位叫做周凡夫嘅師傅向馬太落降頭。
不過據了解，周凡夫其實係風水師傅，主要幫人睇流年運程同家居風水，根本唔會去做落降呢啲嘢。而馮仁昭噚日就打電話問馬太信唔信阿珍咁做？佢笑住咁話：「啋！大吉利是咩！𠵱家二十一世紀，邊有啲咁嘅嘢㗎，我同阿珍識咗咁耐，知道佢唔係啲咁嘅人，我唔信阿珍咁做，而阿珍亦冇本事做啲咁嘅嘢，講呢啲嘢嘅人真無聊。」
阿珍前夫許愿亦話唔覺得阿珍信落降頭嘅嘢；不過，由於近日唔少傳媒追訪阿珍，佢怕個女會受騷擾，所以打算同阿珍商量，畀個女喺佢屋企住多幾日，等件事丟淡啲先至送個女返去阿珍嗰邊。
此外，阿珍老友葉蘊儀噚日出席剪綵活動時，話未見過阿珍用藥物嚟控制情緒，但無論點都好，呢件事不宜講太多，以免對小朋友有影響。
廖碧兒噚日喺柴灣幫纖體飲品拍廣告，對於有指佢大前晚拍《妙手仁心III》嗰陣，因有記者到場，所以黑晒面唔肯同林保怡拍激吻嘅戲份，搞到場戲要臨時改期再拍，廖碧兒就話自己唔係因為見到記者黑面，佢話：「黑面係劇情需要，登出嚟嘅相都係拍緊嗰時影，識我嘅人都知我唔會為咗拍kiss戲而發脾氣。」
顧紀筠前晚喺灣仔君悅酒店同夫婿陳仕偉補擺喜酒，鄭裕玲都有去祝賀，顧老闆重同埋個仔、老公、同埋繼子女上台唱歌，場面溫馨。嘟嘟前晚十一點先行離去，佢話：「真係戥佢哋開心，原來佢哋三個小朋友個英文名都係A字開頭，真係三個A。」
奀妹傅天穎喺香港消失咗一段日子，原來佢早前返咗老家台灣發展，奀妹話同佢分咗手六年嘅台灣證券業男友，最近竟要求同佢復合，奀妹話自己重考慮緊，不過對方喺七夕嗰日就冇乜表示，搞到佢一個人留喺屋企，好無聊。
梁詠琪（GiGi）噚日同黃貫中（阿Paul）到沙田出席CASH作詞大賽決賽，GiGi啱啱喺寧夏返嚟，提到楊采妮早前親善探訪呢個中國最貧困地區時忍唔住狂喊，GiGi就話：「我自己都有喊，嗰度環境好差，我哋惟有互相安慰。」而阿Paul就提到Beyond日前喺上海做騷嗰陣，歌迷為心急見佢哋而催促其他樂隊離場，阿Paul話：「支持偶像都唔應該向人喝倒采，咁即係冇文化。」
吳卓羲噚日以代言人身份，出席銅鑼灣一個健康食品活動，吸引咗過百fans到場。馮仁昭見現場竟然有唔少菲律賓女傭同印傭嚟捧場，估唔到佢𠵱家變埋外傭殺手！問吳卓羲開唔開心，佢就話：「連佢哋都支持，梗係開心感動啦，等我學定幾句菲律賓話同佢哋溝通。」
