切斷手指、休克、撞傷手腳等工業意外經常出現，若能愈早搶救傷者，便愈能令傷勢減輕，亦可見急救的重要性。因此擁有急救證書已成為不少行業請人的先決條件，如救生員、老人院護理員等；政府近年更修訂法例，規定30人以上的地盤最少要有一名曾受急救訓練的人，考取急救資格已成為一股新趨勢！
記者︰陳漢威 攝影︰楊錦文
「當初老闆好積極推薦我讀呢個急救課程，重應承我攞到證書後加我$500人工，所以我就喺公餘時間考咗張證書。」25歲的豪仔，中五畢業後一直在地盤當文員，上年中考獲急救證書後便獲提升為安全主任。「𠵱家我最主要係做管理工作，例如叫工人小心做嘢，帶番安全帽，執番好啲架生，減少意外發生；但工人往往貪方便或者做嘢唔小心，所以時不時都要趕去幫佢哋做急救。」
「最深刻一次係發生喺上年年尾，有個夥計用車床嗰陣唔小心，連埋隻手指尾一齊鋸埋出嚟，我接到電話即刻帶埋個冰袋趕去現場，即時幫佢止血，再吩咐同事打999，最後將隻斷指放入冰袋裏面等救傷車嚟。」豪仔表示，最欣慰的地方是那名同事的斷指在送院後成功駁回，休息一個月後便可正常開工。
「唔好以為急救好似做戲咁簡單，其實好專業，如果你唔識急救，亂將隻斷指放入個放滿冰嘅袋入面，就會因太凍壞死啲神經，駁番都冇用，正確嘅辦法係放入一個有冰有水嘅冰袋入面，然後同傷者一齊送去醫院做手術。」豪仔每星期總會遇上4至5次大小不同的工業意外，雖然救傷工作可以讓他獲得很大滿足感，但亦為工人常貪一時之快而受傷感慨。
每年1萬4千多人獲證書
「單以聖約翰嘅數字計算，上年度已有1萬4千幾人考取急救資格，當中唔單止有救護人員同紀律部隊，更有唔少教師、教練、建築工人，急救課程可以話愈來愈普及，相信對工作表現有一定幫助。」香港聖約翰救護機構訓練主任鄭錦華表示，家庭、工業、交通意外經常在我們身邊發生，學曉急救可以助人助己。「就以早前有個小朋友執波電親為例，如果當時現場有人識急救，就可以幫佢做心外壓和人工呼吸。」至於考獲急救證書的學員，更可報讀講師訓練班，教授其他人。
「學識急救希望必要時幫到學生做治療，減少佢哋受傷嘅痛楚。」已擔任中學教師達8年的胡小姐，今年更被校方委任為女子排球隊教練，「學生經常會發生小意外，學識急救始終對自己嘅工作有幫助，加上學校每年都會舉辦戶外活動，萬一遇到意外都應付得來。」
「學急救係出於興趣，始終幫人係好有意義，加上多門技能對將來搵工有幫助。」Jacky今年升讀大學一年級，他希望急救課程畢業後可以做義工，為社會服務。「急救課程可以學到好多嘢，例如點樣為傷者止血，應付骨折、休克、窒息等，非常實用。」
遇到傷者，首先要讓他們冷靜，然後詢問他們為何受傷及哪裏感到痛楚，以便確認他是否清醒及進一步採取適當的急救工作。
遇到小腿或大腿骨折的傷者，首先要讓他們躺下或坐着，減輕傷勢惡化之餘，亦可觀察傷者傷勢，遇有情況較嚴重者應即時呼召救護車，並進行包紮工作，目的是固定位置，防止骨折位置移位。
成人急救課程（PCFA223/04/05）
主辦機構︰香港聖約翰救護機構
內容︰應付危急時採取的措施、窒息、休克、中毒、燒傷等處理方法及傷者運送等。
開課日期︰9月23日至10月28日（逢星期二、四）
時間︰7:00pm-10:00pm（共30小時）
學費︰$240
查詢︰25308020
備註：考試及格後均可獲香港特別行政區政府認可、為期3年之「成人急救證書」。每張$50
基本急救修業證書課程（EFA0410/SW13）
主辦機構︰香港紅十字會
內容︰各種急救知識、一些簡單流血的包紮實習、意外受傷時的即時處理方法等。
開課日期︰10月9日（星期六）
時間︰2:00pm-6:00pm
學費︰$150
查詢︰21529339
*以上課程學員須年滿16歲
