日本偶像少女雖然個個喺螢幕前鬼咁可愛，但係其實佢哋私底下有好多令人吃驚嘅怪癖！好似上戶彩咁，繼早前自爆鍾意聞臭襪後，原來佢食納豆嘅方法非常怪誕，真係唔講你唔知！
身為日本納豆協會嘅宣傳大使、有「納豆皇后」之稱嘅上戶彩，鍾意食納豆就係人都知，每次拍外景都會帶備兩盒納豆。彩妹食納豆嘅方式零舍古怪，竟然鍾意用搽滿牛油嘅方包夾住芝士再加埋納豆一齊食。
至於平日cool到爆嘅柴崎幸，原來同彩妹一樣都係納豆迷，不論食拉麵、麻婆豆腐、甚至烏冬都可以撈埋納豆一齊食，簡直匪夷所思。佢同彩妹直頭可以堪稱為日本藝能界嘅「納豆Twins」！
至於組合morning娘眾多成員中亦不乏怪人，好似藤本美貴咁，原來佢係「食肉獸」一名，一日三餐食燒肉都冇所謂。而矢口真里就最鍾意食冇味嘅刨冰，本來都冇乜問題，最弊係佢喺演出之前食得太多，搞到個肚「咕咕」聲。
至於水着偶像一姐小倉優子原來對甜嘢情有獨鍾，佢食親正餐前都要食大量零食，食拉麵又要加砂糖，都咪話唔嚇親街坊。