眾所周知，「一國兩制」原本係針對台灣而設，最後台灣問題未出台，香港問題已經上議程，鄧小平順手牽來，就命當年新成立嘅港澳辦專責將呢個偉大構思用喺香港同澳門身上。
最近中方大事慶祝鄧小平誕生一百周年，久未露面嘅魯平同周南佢哋又再次蒲頭，大讚老鄧當年幾咁高瞻遠矚。
魯平重向《文匯報》爆出九七前曾經提議過，為咗穩定香港工商界嘅信心問題，不如喺瑞士呢個中立國家設立一間保險公司，專保香港97後嘅政治風險，重好認真搵過中國銀行同中國人民保險公司傾過，不過，後來就事忙，不了了之。
雖然做唔成，但係魯平好有信心唔會要賠錢，因為中國心中有數，好似老鄧咁話，有信心香港喺回歸後會冇事。真係好彩間公司最後冇成立到，唔係一個《基本法》23條立法，一個人大釋法強行鎮壓雙普選，搞到人心惶惶，五十萬人上街，都有排賠。
傳真︰2623-9278
電郵︰