上周五紐約期油最高49.4美元，埋單價47.86美元，全日反跌0.84美元。當好多專家話睇升幾多幾多之時，可能就係見頂之日。油價回落機會大過再升，美股以至全球股市，回升機會又增加咗。港股有長和系業績幾乎一致叫好嘅支撐下，隨時撲向12500甚至更高。
中銀C輪：上周五，中銀（2388）收13.35元，升5仙，但所有C輪都跌（少數冇成交，冇跌到但冇升）。咁嘅情況可以代表短期中銀冇力上升，C輪行先一步，溢價收縮。
中銀C輪9169，數據好靚，明年2月到期，輪價11.7仙，溢價1.5%，槓桿率11.4倍（有效7.7倍），引伸波幅21%。正股若然落後大市，9169平平哋諗得過。半年壽命期內，正股升多過跌，9169溢價低，揸佢好着數。喺低位短炒亦有得諗，因為隻輪交投好旺，做嘢貼價，買賣唔憂冇對手。
長實C輪：上周五話長實（001）若然唔係升得太多，可以諗吓長實C輪。長實升50仙，C輪9973升1.6%，但主角9227則跌1格，更加買得過。9227重有兩個半月壽命，輪價47.5仙，溢價1.2%，槓桿率13.1倍（有效7.7倍），引伸波幅21%。
新地C輪：長實有勢，新地（016）都有機會受到拖動。油價下跌令大市氣氛好轉，亦有利新地。新地C輪，可以搵一件短炒，主角係9391，12月到期，輪價58仙，溢價1%，槓桿率11.9倍（有效8.6倍），引伸波幅22%。其他新地C輪數據，冇隻比得上9391。
章盛