零售M請飲茶，去山光道馬會嘉樂樓，上到去，全場滿座，生意十分好。在門口問位之際，俾人喝咗一聲，立即回頭一望，一位身材甚弗，滿頭白髮，戴住太陽鏡嘅老翁站在身後，佢再喝一聲：「唔認得我呀？」跟住除眼鏡，唉吔，望真啲，乃係唔見八、九年嘅賓架O，乜老咗咁多？
於是相認，問佢：「最近有乜行當？」賓架O笑一笑，似番個中年人嘞，佢話：「唔見你咁耐，冇做嘢咁耐，重有乜好搞。日日起身，刨完報紙，就嚟馬會做gym、游水，跟住飲茶。如果有老友叫我去外地旅行，立即跟住去！」於是順便問候埋同佢好熟嘅死黨賓架W、賓架T，佢哋近況又如何呀？賓架O話：「情況同我一樣，退休好耐咯。」
乜咁快退晒休，呢三位賓架，經驗豐富，聰明過人，年紀唔算大啫，五十零歲之嘛，以前三十零歲之時喺外資銀行叱咤風雲，但外資銀行陸續併購，連個名都冇埋，佢哋做慣高級職位嘅，就好難轉行，何況九七之後，中年人唔容易搵工呢。報道失業率百分之六點九之日（八月二十日），《文匯報》標題：中年悲歌——指出五十至五十九歲嘅朋友，失業率高過百分之九。
好彩賓架O、賓架T、賓架W教育程度高，一早識得理財，提早退休唔憂米，到馬會玩樂，唔算辛苦吖。中銀香港宣稱會環球公開招聘副總裁以代替出事嘅朱赤、丁燕生。咦，佢哋三位有資格做喎，講年齡，與李永鴻差唔多啫。不過現在做銀行高層，特別係中銀高層的replacement（替代人），要金管局批，銀行界人士話任志剛會睇得好緊，唔輕易OK，佢哋離開銀行界耐一啲，唔知過唔過得到金管局呢一關。