自從俄羅斯油王阿巴莫域治入主車路士後，就不時有傳聞話有俄國大亨會入股英超球會，不過次次都係冇米粥。不過，今次就唔同，據英國傳媒報道，一名叫做辛加歷維治嘅俄國造紙大亨，準備以二千萬鎊（約二億九千萬港元）買愛華頓四成股權，成為佢哋嘅大股東；而愛華頓就話會喺星期一開股東大會商量新投資大計。
辛加歷維治睇中愛華頓，相信好大程度係因為佢哋有新星前鋒朗尼。不過呢個英格蘭神童認真唔生性，喺星期日又俾小報踢爆佢以前成日去（聽講有十次）揼骨同埋妓院，重俾妓院嘅閉路電視拍到佢嫖妓過程㖭！雖然球員最重要係喺球場上表現，但太多負面新聞，始終影響佢嘅市場價值；到時俄國大亨唔入股，愛華頓就真係多得朗尼唔少。
利物浦門將杜迪上周六英超喺完半場前「發波瘟」，接波甩手俾安歷卡射入空門；點知樸茨茅夫門將希斯納重肉酸，又係接波甩手兼整埋個波入網！結果英傳媒賽後以嘲諷希斯納表現為主，杜迪就幸免於難；因利記最後贏波；老樸就係呢記失誤全失三分，同人唔同命咯！
車仔贏伯明翰，領隊摩連奴話估唔到英國波咁兇狠，沙維治向基斯文打踭都無人理，希望裁判小組睇番錄影帶，有番個公道。我求大俠覺得車仔班球員都唔係善男信女，好似卡華奴成日踢低希斯基。不過，佢哋聽日作客水晶宮，可能先體驗到真正嘅「地道」英式足球風格！
修咸頓日前贏布力般有餘波，足總發現執法球證杜烏素喺賽後報告中，曾兩次黃牌警告過巴利費格遜，但無趕佢出場，故要調查事件，並要杜烏素解釋，而巴利費格遜預料要因「紅牌」停賽；杜烏素喺英超評級一向偏低，今次「烏吓烏吓」，都唔知重有無機會執法。
史譚加盟AC後，唔少球迷好關注隊長馬甸尼踢番成名位置左閘重掂唔掂。前日對拉素場超級盃係佢第七百五十次替AC出賽，佢為讓路畀史譚果然踢左閘，上半場助攻勁射中楣；舒夫真高其中兩個入球都多得佢傳送。佢咁生猛，各位「馬仔」擁躉暫可放下心頭大石啦。