大班封咪事件剛剛淡化，胡恩威林奕華套《開咪封咪》已經火熱登場，吸引好多官政傳媒文化界捧場。八方禮拜六去到藝術中心，周圍都係熟人，起碼有兩張大報嘅採主嚟睇。最妙係入咗場，劉慧卿坐喺後一行，而套劇其中講黃毓民嘅精采一幕，不停咁「玩」卿姐。聽聞早幾日佢哋「玩」阿曾俊華時，局長亦在座，重好大方講咗幾句㖭。
套劇一共有十七幕，六個演員，內容好貼近時事，又尖銳抵死，好多觀眾都笑到抽筋。其中第十五幕叫「傳媒老細」，就係「玩」肥佬黎。嗰位扮肥佬黎嘅楊永德，雖然完全唔肥，亦冇剃光頭，但講嘢嘅神態就好似，而劇中嘅對白，亦係幾年前肥佬黎經常講嘅，究竟邊個係二五仔呢？
（圖）《開咪封咪》嘅演員楊永德有一幕扮肥佬黎好神似。
傳真︰2623-9278
電郵︰