近呢幾個月，香港整體經濟氣氛唔錯，失業率冇再攀升，連續兩季企穩百分之六點九。
過去兩、三年，大使睇住啲求助個案數字不斷飆升，深深體會到經濟唔好，好多人冇工開，唔少男子漢都要拋開尊嚴，求大使幫手，你都咪話唔心酸。
香港嘅經濟雖然略有起色，但就唔係人人受惠，最近大使收到唔少求助電話，好多因為搵唔到嘢做，冇飯開兼且要瞓街，當中有唔少重係三十幾歲嘅後生仔。
有見及此，蘋果基金好積極幫助呢班苦主，包括撥款資助佢哋報讀各項牌照課程，增強競爭力；同時搵贊助幫補佢哋嘅搵工車費，甚至為佢哋籌募手提電話，方便僱主聯絡，有啲啱啱搵到工做，但係重未出糧，連兩餐食飯錢，同返工嘅車費都未有着落，蘋果基金都會諗辦法盡量提供協助。
為咗應付上述各項工作，蘋果基金好需要大家繼續支持，正所謂有錢出錢，有力出力，大使亦呼籲各位老闆，如果有職位空缺嘅話，不妨優先考慮我哋一班待業苦主，等佢哋可以自力更生，擺脫逆境。
暖流熱線
電話：29908688
傳真：23702192
電郵：
網址：