今期「一周兩件」主打富豪（078），順手撈埋中國海外發展（688），兩隻股今年繼續受惠富豪海灣回撥。
富豪上星期四宣布玩具大王蔡志明入局，獲委任做富豪副主席；同一日，有份參與富豪海灣項目嘅中國海外，公布04年中期（6月止）業績，中國海外管理層話，富豪海灣重有1億元到2億元回撥，有機會喺下半年入帳。
中國海外管理層言論，可以聯想到，家陣揸住富豪海灣70%權益嘅富豪，今年同樣有機會受惠項目回撥。睇數據，亦係咁分析。
富豪主席羅旭瑞講過，富豪海灣全數出售，可以回撥23億元。03年度（12月止）富豪海灣只係回撥預期總額8.6%，即係2億元咁大把。項目由上年7、8月開展銷售以來，已經售出64%，即89個洋房。有理由相信，富豪03年就項目回撥，好忍手，04年度仍然有大把回撥水位。
同時，呢期香港旅遊業大放異彩，集團將於9月下旬公布04年中期業績，肯定虧轉盈，酒店本業兼有唔錯業績，適逢緊接「10.1」黃金周，買定等創一年新高，應該係時候。
再講中海發展，上星期四公布04年中期，純利超出預期，升74%到3.68億元。中國海外呢勻純利彈出，主力靠國內樓盤，所以，若果下半年同樣有上半年好成績，未計入富豪海灣回撥，04年度純利講緊已經7.36億元，超出03年度6.88億元，若再加埋富豪海灣回撥上限2億元，全年總計純利9.36億元，增長36%。
此股上周五曾突破今年頭以來嘅下降軌，開始聞到味道，留意1.54元阻力關，破位即上。
錢雋