李麗珍與髮型師馬桂燦（JackyMa）夫婦的三人不倫戀被揭後掀起軒然大波，有傳李麗珍現時已避走美國，JackyMa則工作停頓，馬太李靜婷更無家可歸。昨日馬太透露過去一年多來的折磨令她出現精神分裂先兆，年初試過一腳跨出樓高四十七層的寓所窗邊，有意了斷殘生。
李麗珍與馬桂燦夫婦同居的不倫戀曝光後，過去兩星期以來鬧得滿城風雨，至今三位主角各行各路，JackyMa工作全面停頓，李麗珍藉登台避走美國，而馬太李靜婷則因丈夫欠租而被迫遷，無依無靠的她現時暫居酒店。昨日馬太接受本報記者訪問時，哭訴過去一年多來受盡精神折磨，其間她曾出現精神分裂先兆，萌起輕生念頭，並透露現時感到十分彷徨無助。
昨午四時許，身穿一襲粉紅色大花裙的馬太現身中環，但在一片粉紅映照下仍未能為其憔悴的臉添上血色，事後她接受本報訪問時苦笑說：「梗係憔悴啦，我得番九十幾磅咋。」
對於其色慾手稿被雜誌刊登一事，馬太昨日表示不欲多提，但她直言過去一年所過的日子十分磨人。馬太說：「我記得喺今年農曆年，我好唔開心，喺屋企一腳檻過窗邊，真係好萬念俱灰，係為乜嘢事唔記得啦，總之就好唔開心，呢個時候我諗起我個仔，佢係我嘅太陽，我唔可以就咁唔理佢。」馬太說到此處已語帶嗚咽，由於她農曆年期間仍居於寶翠園四十七樓的寓所，當時情況確實驚險。
馬太停了一會又續說：「我知咁樣唔可以解決問題，都要去面對，𠵱家重難受啦，我好希望搵嘢做，重新開始。」
馬太其後又表示多年前曾患上精神分裂症，經診治後本已康復，但過去一年多的生活又再令她出現精神分裂的先兆。馬太說：「嗰時我生第一胎，有產後抑鬱，精神崩潰，個人好唔開心，屈屈埋埋咁，我有睇醫生，後尾好番冇事，但呢年幾真係喺精神上受好多折磨，李小姐走嚟我屋企嗌交，掟爛晒我屋企啲古董，又成日屈我。」
馬太指李麗珍試過呼喝及以粗口辱罵她，甚至出手動粗。馬太說：「佢重試過一日打我三次，我忍無可忍，終於還手，一腳踢到佢成個撻低，佢即刻攤喺度郁唔到。咁嘅生活真係好難捱，我又開始精神緊張，瞓唔到覺，晚晚喺度行嚟行去，呢啲已經係精神分裂嘅先兆。」馬太自言不想長此下去，所以決定搬家，與當時同住寶翠園的李麗珍劃清界線，她自言搬家後便不再沉淪藥物，希望能振作過來。
對於有報道指她與JackyMa因性生活不協調而令李麗珍有機可乘，馬太直認屬實，她說：「我同我老公係性生活不協調，問題喺我度，或者係因為我哋結咗婚太耐，我已經淡晒。」問她當時可有想過如何令夫婦間的性生活回復正常？馬太搖頭說：「冇，所以係我嘅問題，後來李小姐介入咗，我老公就迷咗落去，佢兩個都好堅（性生活）㗎。自從李小姐出現之後，我同我老公直情冇咗性生活。」
馬太曾透露與李麗珍有同性關係，昨日她強調只是覺得李麗珍「靚」及「喜歡她」，並非與李麗珍有性關係。不過馬太在言談間明顯對李麗珍又愛又恨，她說：「我不嬲有食安眠藥嘅習慣，醫生會開一個月嘅藥畀我，有成三十粒，李小姐有次話我食咗成二十幾粒，我根本都冇，佢就叫Jacky夾手夾腳抬我去醫院，後尾喺垃圾桶執番嗰啲藥，佢屈我呀。」其後她又補充說：「李小姐個人本身唔係太衰，佢都孝順嘅，一個人孭起成頭家，佢細佬買樓都係佢畀首期，又買車畀佢，佢打本畀細妹開美容院，只不過佢好多嘢喺倔頭巷打圈，唉！」
對於昨日有報道指她日內有料爆一事，馬太昨直斥道：「爆佢個死人頭，我自己爆炸啦，冇嘢爆呀，啲人又抄番我啲手稿嚟登，啲手稿只係四萬字入面其中嘅三千字，全部抄嘅話，啲人四十日唔使做嘢啦。」
此外，李麗珍的前夫許愿前晚帶同女兒到葵青欣賞芭蕾舞表演，其女全程躲在許愿身後迴避鏡頭，同行的葉德嫻亦幫手掩護。許愿透露囡囡近日由他照顧，問到他是否有意取回女兒的撫養權？許愿說：「都會諗吓，考慮吓，睇情況點先啦。」會否禁止前妻見囡囡？他答：「咁又唔會。」提到李麗珍財政出現問題時，許愿則不作回應。
採訪：朱倬誼、卓美娟、顏英儀
攝影：娛樂突發組
