今個星期真係難得熱鬧，3區新碟多籮籮！而且片種非常多元化，除咗樓上嘅恐怖片《複製兒魂》值得一睇外，新碟重有搞笑警匪《孖咇勇探》、開心愛情《野蠻師姐》同三級邵氏經典《唐朝豪放女》。
故事改編自70年代美國名電視劇；《情迷索瑪莉》嘅賓史迪拿同《贖金之王》嘅奧雲韋遜分別飾演拍拖更幹探，可惜一個是追賊9條街的「落力警察」，另一個則是「有牌」蠱惑仔，雙龍出海當然笑話連篇；最開心相信是老戲迷，因為電影結尾時，70年代原裝版嘅「孖咇勇探」都會出場客串，真係懷舊味十足。
《野蠻師姐》VCD版都出咗兩個多星期，終於都等到佢DVD版落場，最開心係一睇，竟然行DTS-ES，玩轉6.1聲道靚聲效，當然靚聲好多啦！
故事雖然老老土土愛情小品，又係一般韓式仇人變情人嘅橋段，不過有全智賢靚女壓陣，加上戲院落畫都冇耐，$78價錢，的確係幾抵睇！
繼早個星期嘅《獨臂刀》後，今個星期再有邵氏猛片壓境──《唐朝豪放女》，真係估唔到84年拍嘅三級片，竟然比現在好多電影都可以嚟得更激、更Grand，難怪本片曾獲1984年金馬獎十大電影兼最佳美術設計獎項！故事內容相當前衞，具有同性及異性戀的混淆，加上後生年代嘅夏文汐「落力」演出，可以話估唔到咁好睇。
查詢：DVDPro
電話：23326326