劉德華最近推出新碟《CoffeeorTea》，更親自填寫五首歌詞，他日前接受訪問，流露出看透世情的心境，華仔認為做人不能只顧追逐名利而忽略身邊的人和事，他亦說出兩個故事，勉勵新人要懂得自愛及互相體諒，了解別人風光背後所作出的努力。 採訪：蔡如玉 攝影：陳偉權
日前推出新碟《CoffeeorTea》的劉德華，與加際唱片的官司訴訟仍未解決，本來華仔去年底欲推出國語碟，卻受加際阻撓而告吹，對此華仔說：「我出唔到碟唔緊要，大不了咪齋拍戲囉，唔好害埋其他人嘛，後來我又唔想屈服，我真係冇錯，就要畀番個公道自己，到𠵱家順利出碟，律師話冇問題。」
華仔在全新廣東碟中，與詞神林夕各填五首歌詞，從華仔所填的歌詞，特別是《影帝無用》一曲來看，他似乎已不再盲目追逐名利，華仔說：「呢首詞係馬龍白蘭度（MarlonBrando）過身時寫嘅，佢係我偶像，雖然事業曾經風光過，但係老來嘅生活好似唔係好如意，真係有啲欷歔，畀你再叻再好又點呀？永遠只記得追逐名利而忘記身邊嘅一切係冇用㗎。」
華仔一向熱愛工作，不過他表示現在已懂得調配時間，以便享受家庭生活及與父母去旅行，華仔說：「好多人覺得我好忙，其實香港人個個都一樣，我細佬重忙過我呀，我諗我喺屋企嘅時間多過我其他兄弟姊妹，其實每個人都為生活而忙碌，睇你識唔識處理囉。」問華仔是否已看透世情，他說：「都幾㗎，當然都重有執着嘅時候，接咗一項工作就要做到最好囉。」
娛樂圈毒品問題近期有惡化趨勢，身為前輩的華仔，自創了兩個動物故事來勉勵新人，第一個是烏鴉與白鴿的故事：烏鴉與白鴿相戀，但烏鴉對自己的黑色感到自卑，覺得配不起白鴿的純潔，一日放下告別信便離開，信中牠謂要等到來世用最純潔的白來重遇白鴿，請白鴿不要忘記牠，但白鴿讀完信後叫烏鴉不要再回來，因為一個不愛自己的人也不值得被人愛。
華仔說：「每個人都要愛惜自己，否則唔會得到其他人嘅尊重同愛之餘，都唔會係個成功嘅人。我諗有壞習慣嘅藝人唔係唔自愛，佢哋係諗唔通，搵唔到啱自己行嘅路。我覺得最緊要唔好諗埋一邊，我做新人時，好好彩遇到譚詠麟周潤發呢啲前輩對我好，成日教我應該點樣搵條啱路畀自己行。
華仔透露有段時間對工作頗迷惘，覺得經常接同樣的角色，以致全都想推掉不幹，幸得周潤發鼓勵，華仔說：「佢話每個工作都係一個機會，我應該有幾多接幾多，自己做晒就即係成個餅都係我嘅，唔接就實俾人攝，到時個餅就會俾人分晒。」
華仔的第二個故事是有關狐狸與白兔：狐狸經常被白兔指摘奸狡，其實狐狸是以自己的聰明及勞力換取應得酬勞，同樣狐狸一直憎恨白兔只會坐在一邊眼紅別人，不用付出就有人來餵飼，白兔反駁謂自己無時無刻都豎高耳朵花心思聆聽別人心聲，怎麼狐狸只會看到牠眼睛中那少許紅！華仔說：「各行各業都係咁，或者娛樂圈更甚，所以好多藝人嘅壓力都好大，人哋覺得你好似紅得好易咁，冇人去留意人哋背後付出過幾多，只識得挑剔，有啲人識得放鬆就會做得更好，唔識調節嘅人咪唔開心同好易抑鬱囉。」
華仔現正忙於籌備本月三十一日展開的十五場紅館個唱，而下月九日當天更是他在紅館舉行的第一百場個人演唱會，他說：「我知嗰日有好多世界各地歌迷都會嚟，本來我個紅館期之前係冰上嘉年華，佢哋肯讓畀我開多幾場，但我唔想買咗第一百場飛嘅歌迷失望，情願賺少啲都唔加，我覺得賺錢係其次，都要理吓人感受。」
劉德華一向都不願將自己的感情生活宣之於口，不過在其新歌《的士司機》中，一段「的士司機察覺，我只有七折一輩子你仍深愛，日復日願交更再開，全為了愛，要越過障礙，我是會回來」，難道這是他愛情生活的寫照？
華仔說：「填呢首歌詞係想呼應番林夕填嘅《按摩女郎》，係講好多人工作嘅行業都要好辛苦面對逆境咋。」那麼華仔是否只能給自己伴侶一個「七折」？他說：「唔知㗎，有可能啦，我諗唔理將來定現在，做得我另一半都一定要愛我多過我愛佢，否則好難維繫，因為我實在好鍾意𠵱家嘅工作，唔係好捨得放低，所以一定要互相遷就，如果我打咗七折都重有人肯遷就我，咁就抵晒啦。」
華仔透露現時未有結婚打算，或者到他想成家立室的時候，那位願意接受「七折劉德華」的人根本不存在，又或者他的愛人非要等到有個完整的劉德華才願意下嫁，那麼他便要再繼續等或努力再尋覓。
華仔多年前曾說過只愛長髮姑娘，那亦是他擇偶標準之一，問他現在喜好是否沒變，華仔笑說：「我到𠵱家都重鍾意女仔留長頭髮，有把靚靚長髮先似番個女仔嘛，又唔係講到全世界女仔都為我留晒長頭髮咁誇張，如果我將來鍾意咗一個人，佢係都要剪短頭髮我都冇辦法，呢啲嘢好講緣份。不過我諗有呢個情意結，可能因為我初戀女友係留長頭髮啩。」
