無綫前晚的《2004雅典奧運》直播室十分熱鬧，業務總經理陳志雲和應屆港姐徐子珊帶備了燕窩、生果、參茶和心意卡到來探班。
陳志雲表示：「我知道大家近來都做得辛苦，又大壓力，所以專登嚟慰勞大家，雖然之前收到唔少投訴，但作出改善後，𠵱家做得幾好。」
而徐子珊在本周開始會加入做奧運主持，初時因奧運節目負面新聞太多，公司亦不敢派她做主持，徐子珊說：「之前公司都係擔心我精神狀態，所以先唔派畀我做住，𠵱家公司認為我可以應付，所以就叫我去試吓，我會視為一項新挑戰。」
此外，據悉有市民投訴葉璇昨日凌晨訪問香港乒乓球好手高禮澤時講說話太快，聲音更一度掩蓋被訪者，予人不尊重之感，對此葉璇在電話接受訪問時說：「監製話OK冇問題，佢重嫌我唔夠興奮㖭。」而監製李漢源亦強調是他叫葉璇以開心的心情及形式去做，所以問題不大。