自嘲駁手駁腳似機械人
窪塚親筆留言慶幸死唔去

日本光頭影帝窪塚洋介，自從六月六號喺佢九樓寓所露台墮樓奇迹生還之後，外間都好關心佢嘅情況。早前日本雜誌《女性Seven》偷拍到佢坐輪椅嘅相，前日佢終於親筆寫咗封信放上個人網頁度，剖白佢墮樓之後嘅心情以及近況，而佢重喺噚晚播出嘅日本TBS電視台嘅新聞節目上接受咗獨家訪問。

感激醫護人員
窪塚喺message度話自己對墮樓一事冇晒記憶，當佢回復意識時已經喺醫院嘅病床上。雖然頭、雙腳、左手同肋骨都有骨折，但好彩個腦冇事。而佢喺六月二十一號接受咗一次手術，喺左手同雙腳上加上金屬，佢重開玩笑話自己好似超合金機械人㖭。
窪塚𠵱家正接受物理治療同學習步行，重話今次係佢人生中第二次學行路。佢表示好感激今次自己可以僥倖生存，係全靠家人同醫生護士嘅悉心照顧，佢重因為自己為大家帶嚟嘅麻煩而道歉。
另外，窪塚喺墮樓前為日本TBS電視台拍咗一個美國旅遊節目，而佢噚晚亦接受咗該電視台新聞節目《Broadcaster》嘅獨家訪問。