教統局常任秘書長羅范椒芬對住學生，永遠來者不拒，展示出一副auntie形象，噚日佢出席港台搞嘅第三屆「永不放棄同學會」活動畢業禮，學生叫佢跟住步操佢都肯，一時向左轉，一時一百八十度向後轉，都唔知鬼咁開心。「飯焦」話，佢讀書時有參加紅十字會，操開步操，好有經驗。
「永不放棄同學會」係三年前由港台青年人節目主持麥潤壽出錢搞，三年嚟花咗佢成十萬蚊，原因係要報答年輕聽眾選佢做港台最受歡迎主持人，今年得到港台將呢個活動納入「太陽計劃2004」，可以得到啲資助。佢話透過活動，訓練學生學習吓日常生活同人際技巧，睇見啲學生參加後脫胎換骨，佢話都覺得值得。
「飯焦」見到個活動咁成功，又拋出新諗頭，就係叫有心人搞「暑期學校」，等啲學生哥趁暑期學吓常規課程以外嘅嘢。羅太，政府係唔係會「磅水」先？要個個學麥潤壽咁自己出錢出力唔容易。
講開「飯焦」，佢個「特首情意結」又發作，噚日佢又乘機喺班學生面前為董生拉票，話多得董生喺○○年定下教育藍圖，因而有毅進同副學士課程，以致今年唔少讀唔到中六嘅學生都有其他出路。羅太近期成日為董生宣傳，之前講過「學生最冇資格批評特首」惹起劣評，唔通佢唔記得？
傳真︰2623-9278
電郵︰