本欄八月十三日講「騰達智能案」，話報紙冇乜報道，嘥咗一個精采財經古仔。一位讀者E來電郵話，佢係一個日日上庭聽騰達智能案嘅記者，起碼都有寫過幾篇見報，點知左丁山睇唔到。
原來記者E咁努力，於是收到《蘋果》轉來電郵之日（八月十七），立即上「慧訊網」（Wisers）（嘩，好貴，每月畀訂費四千，好肉痛）搜查有關「騰達智能案」嘅報道，卒之搵到兩篇，一篇係左丁山嘅八月十三日《GG細語》，一篇係八月十七日《太陽報》報道：騰達特赦證人通宵造假︱︱係咁多咯喎，即係話，如果Wisers冇錯嘅話，全港報紙只得一張《太陽》有留意騰達智能案。讀者E唔知係邊一間報紙呢？
睇《太陽》報道，幾過癮噃，前「騰達智能」（0691）財務總監盧桂文以特赦證人身份出庭作證，話安永（核數師）進行周年審計前，佢與一位女同事通宵開工，偽做文件，製造公司印章。嘩，咁都得，上市公司造假數，好猖狂。嗱，咁好睇嘅財經新聞，只係一張報紙關心，問你點辦？
另有讀者鄭指正，鄧永鏘係鄧肇堅爵士嘅孫。多謝、多謝。另外關於「棄甲曳兵」嘅典故，有幾位讀者（包括壹仔校對）來電郵、傳真，不厭其煩咁指點左丁山，真係好多謝。上次左丁山一時大意，誤解曳兵，蒙讀者指正，茲修改如下：兵者，兵器也，刀槍劍戟之類，曳兵就係拖曳兵器逃跑也，另外，「秣馬厲兵」之兵，亦兵器也，言磨礪兵器；以上多謝張翁。
在此寫稿，壓力甚大，因《蘋果》讀者極多，勁有料，偶有疏忽錯漏，即刻俾讀者將軍，好彩讀者愛我厚我，不吝指正，以後請繼續。