參選九龍東嘅大律師梁家傑，要同左派陣營陳婉嫻同陳鑑林對壘，又要同同屬民主派嘅民主黨李華明及鄭經翰競爭，一直被人話形象略嫌拘謹嘅梁大狀，諗咗個新招，就係搵一對孖仔梁皓宏、梁皓偉同囡囡Jennifer，以充滿童趣嘅畫筆，畫成嘅宣傳單張派畀九龍東嘅選民。
梁家傑搵小朋友作畫，其實大有深意，佢嘅宣傳單張上話，自己喺香港出生、受教育同埋生兒育女，擁有嘅一切都拜香港法治制度同公平環境所賜，但擔心下一代唔可以好似佢咁，享受同樣優良保障，希望以自己嘅法律專長盡一分力，幫手監察政府。
八方見啲畫色彩繽紛可愛，原來多數係三位小朋友平時畫好嘅得意之作，只有封面一幅畫咗投票站嘅畫，係小朋友特別為今次選舉而畫，相信梁大狀一路派呢款傳單時，一路從心底笑出嚟。
傳真︰2623-9278
電郵︰