商場大業主不時搞活動，增加人流量，幫租戶創造商機，𠵱家重有新手法，就係延長營業時間。
信和屯門市廣場，本月底前，逢禮拜五六，押後閂門時間，由晚上九點延長至凌晨十二點，多三粒鐘。
聽講係因為暑假就快結束，等啲學生可以最後衝刺，添置物品迎開學。同時，商場唔少租戶大減價，咁做又可以幫到佢哋。
信和陳欽玲話，佢喺呢區返工，有時食完晚飯，發覺商場租戶大部份閂門，想買嘢都唔得，唔少居民出市區返工，返到屋企都好夜，變成冇機會逛街，所以至有呢個構思。陳欽玲話，延長營業時間，商戶生意增加七至十個巴仙。
今次約有七至八成租戶將營業時間延長。另外，晚上八點半到十點半，場內重有神秘大使，向五十名幸運兒派禮物，包括折扣券同超市現金券等。
原來唔少屯門居民晚上出動，但區內玩同消費嘅地方唔多，屯門市廣場係焦點，所以假日人流量成二十七萬。
富豪酒店嘅赤柱富豪海灣，銷情理想，宣傳攻勢奏效係原因之一，現再出招，以逾百萬，贊助九月十八號紅磡體育館舉行嘅星光熠熠耀保良，以特約播放形式贊助。今次係呢個節目首度接受贊助。聽講，當晚現場直播，會加入一啲同富豪海灣有關嘅元素。
呢次贊助，係由富豪執行董事羅寶文諗出嚟，佢重幫富豪海灣嘅電視主題曲填上英文歌詞，呢首「LoveParadise」係藝人陳慧琳九月新碟嘅主打。
當晚有份演出嘅藝人，部份曾經演出過富豪海灣電視音樂劇「富豪海灣非凡情緣及至尊家緣」。
樓市雖然好轉，發展商起樓，都要搞吓新意思，增加賣點。恒基林達民話，計劃遲啲去漢城，參觀三星集團嘅CyberVillage，睇吓高科技住宅係點樣。
佢話啲住宅除咗可用指紋辨認身份，重可以自動辨認來電係搵邊個，然後接去當事人間房。洋房加入呢啲設施，估計費用要過百萬，但相對香港洋房嘅價錢，只係濕濕碎。
林達民話，大埔比華利山項目，重有百六間洋房未起，可能引入呢類設施。IT一族可能好感興趣。
另外，恒基續賣西灣河嘉亨灣，林達民話，有香港基金大手洽購，涉及數量同銀碼，可能多過賭王何鴻燊四太梁安琪，四太共購入三層，值億半。洽購嘅單位喺二同六座，下周有眉目。
投資物業以舖位較活躍，中記鄭琪俊話，灣仔譚臣道一○二號地下連閣樓，剛以千三萬易手，地下一百呎，閣樓九百呎，估計回報六厘半。
呢個舖位一直由一品香持有，經營食肆二十幾年，現在售後租回，套番一筆。
另外，中環閣麟街九至十一號全幢，剛以二千二百萬賣出，地下分為兩舖，月收五萬三，樓上一至五樓住宅，一梯兩伙，大部份交吉，估計回報有六厘六。
蘭西
電郵地址：