長和系成績表靚，市場收貨，長實（001）與和黃（013）各有50仙與1元進帳。奈何油價不斷見新高，睇報紙，睇電視，聽電台，都成日接觸到油價新聞，困擾人心，令人唔多舒服，所以個市冇動作。恒指跌19點，淨係中移動（941）已經拖低38點，一般藍籌變化都係好細。
恒指C輪：恒指窩輪，例牌好大成交，10大金額排頭位嗰6隻，都係恒指輪，有C有P。6隻輪總成交2.82億元，佔大市總成交3.2%，相當犀利，唔少炒家短炒，一日轉幾次，微中取利，反正炒輪唔使畀印花稅，成本輕，「1格」價位已經夠食餐晏仔。
恒指C輪最熱門嘅係2153，明年1月到期，輪價21.2仙，溢價9.1%，槓桿率24.3倍（有效9.7倍），引伸波幅24%。其次2231，明年2月到期，輪價21.8仙，溢價6.1%，槓桿率13.2倍（有效7.3倍），引伸波幅25%。2231較2153可取，暫時炒上落，跌5%分段買入，升5%分段沽出。
恒指P輪：恒指P輪最熱門嘅係2150，明年1月到期，輪價14.2仙，溢價7.2%，槓桿率17.4倍（有效7.8倍），引伸波幅24%。其次9896，10月尾夠鐘，輪價12.1仙，溢價3.7%，槓桿率21.3倍（有效11.6倍），引伸波幅22%。炒上落，揀2150化算啲。
中石油C輪：中石油（857）冇郁，但C輪2243則升5.9%，收23.5仙。隻輪明年7月到期，溢價18.8%，槓桿率16.2倍（有效5.9倍），呢件新出爐C輪，等平啲至諗。
章盛