鄭裕玲（嘟嘟）同無綫下個月底就會約滿，佢作為一個咁有份量嘅藝人，難怪管理層對嘟嘟續約呢件事非常重視。大前日下晝五點幾，無綫總經理陳志雲同製作資源部副總監樂易玲，就專誠約咗嘟嘟喺又一城嘅一間食肆傾續約嘅事。馮仁昭見佢哋有講有笑，氣氛相當融洽，而佢哋傾到六點半左右就離開，本來馮仁昭想問嘟嘟傾成點，但佢點都唔肯多講半句。
後來馮仁昭打電話問陳志雲，佢話嘟嘟續約無綫嘅成數都好高，陳志雲話：「大家見唔到有乜理由唔合作，但內容當然唔可以透露啦！」陳志雲話其實佢哋唔止傾續約問題，嘟嘟重畀咗好多寶貴意見佢哋，事關嘟嘟一向好留意外國電視節目，認為好似外國電視劇《六呎風雲》同一啲真人騷嘅節目都好正，無綫不妨參詳一下。馮仁昭覺得嘟嘟唔止係藝人咁簡單，直頭係無綫嘅軍師㖭！
王菲同李亞鵬拍拖已經係公開嘅事實，所以佢哋兩個喺北京出雙入對都唔再避忌，大前晚佢兩個去咗北京漁陽飯店隔籬嘅香滿樓餐廳食飯，同行嘅重有內地歌手景崗山，佢哋食咗大約兩個鐘頭度先離開，啲侍應重透露話王菲腿部好似有一塊撞傷咗嘅瘀痕㖭，睇嚟王菲同李亞鵬兩個嘅戀情相當穩定。
E-Kids噚日去新城接受訪問，提到吳浩康藏毒案罰款了事，E-Kids都為對方鬆口氣，對於有市民就投訴罰吳浩康五千蚊嘅判決太輕，E-Kids認為唔可以因為對方係歌手而一沉百踩，不過佢哋都話希望第日吳浩康會做番啲正面宣揚反吸毒嘅活動，以表示自己已經洗心革面做人，馮仁昭都覺得呢招幾好。
古天樂前晚去紅磡出席首映禮，古仔重幫冰上兒童劇嘅主角小木偶配音，佢話：「早排喺馬來西亞配音，要扮細路仔聲，好好玩，啲馬拉工作人員重狂買補品、燉水魚畀我食，等我開聲補一補，不過我怕流鼻血，只係食咗一盅。」無綫早前有人事變動，仍有合約喺身嘅古仔揚言唔想長駐內地拍劇，佢話：「我有個怪病叫血毒，啲血唔清，成身就會起晒『烘』。」
女子組合2R噚日去咗灣仔出席活動，佢哋本來高高興興以代言人身份宣傳，點知活動完畢，兩個都嬲爆爆離場，因為有位記者攞住張相走埋佢哋身邊，話相中人自稱係佢哋表姐，嗰位表姐重話喺2R爹哋位於新加坡嘅曬相舖附近開咗間性商店㖭！2R聽到都好愕然，佢話相中女人唔係佢哋表姐，而且佢哋覺得有人利用佢哋嘅知名度宣傳，所以激到好嬲。
