七年前，當北京欽點咗阿董做特首嗰陣，大家都對佢幾陌生，淨係知道佢個名「建華」夠晒愛國，要憑名寄意，就一定好過搞八萬五出嚟嘅「振英」哥。不過原來董家利用姓名顯示愛國心，單靠「建華」一人都未夠，佢哋一早就已經諗好埋啲子子孫孫嘅名，夾埋嚟愛國，更顯誠意。
八方噚日去咗一個講「國情教育」嘅座談會，一班讀緊中學同大學嘅領袖生北上學習之後，返香港向董特首同教統局局長李國章滙報行程。李國章真係好鬼識做，問佢老闆「建華」呢個名係咪「建立中華」咁解？點知董特首話個名本身冇乜特別含意，但係佢嗰輩係「建」字輩，而佢個仔嗰輩係「立」字輩，佢個孫嗰輩係「中」字輩，夾埋一齊咪就真係「建立中華」咁解，李局長真醒，咁都俾佢估中。
董氏家族嘅姓名學內含玄機，真係失敬失敬！但係八方唯一覺得有啲美中不足嘅係，如果董特首可以運用影響力，將曾孫個名都改埋做「華」字輩，然後再到「人」、「民」、「共」、「和」、「國」一條龍咁直落，就真係prefect晒。否則後代如有不肖子孫，擅自將下代改做「華」、「民」、「國」字輩，咁就唔係咁好啦！
（圖左二）董建華：中國，我好愛你！
美聯社
設計對白
傳真︰2623-9278
電郵︰