廠家D去完東莞巡視回來，中貿林請佢食飯，搵左丁山作陪。我哋問廠家D喺東莞有冇碰上公安走入酒店客房拍照之事，廠家D話：「我哋好小心嘅，而且呢類事情可能係setup，點會發生喺我哋廠家身上！」
廠家D年紀不少，已將工廠交晒畀個仔，自己情願留在香港總部，久唔久先至去東莞行吓，下一季有一隻新馬嚟咗，會入多啲馬場，少啲上去東莞；發生議員候選人涉嫌召妓事件後，D太會吼到實㖭。
左丁山問佢：「你同電子界好熟，請問買邊個牌子電腦最好？」廠家D話：「我唔係專家，但喺東莞啲台灣行家聽番嚟，ABCDE五隻牌子之中，D牌㩒價最犀利。現在有咗互聯網競投玩意呢回事，害到台灣廠家好杰，因為D牌在網上透過競投買零件，買價愈bid愈低，譬如D牌要零件X，請供應商競投，價低者得。開始競投之後約一個鐘頭，D牌會宣布，現在最低入貨價係十蚊，有冇人bid低啲？於是再來一輪競投，價錢愈來愈低，去到八個半嘞，冇人再敢出低價，D牌就以每件八個半向中標供應商買貨（零件X）。其實以咁嘅價錢，完全冇肉食，接咗單就好驚蝕本，你話廠家會畀啲乜嘢質素嘅貨吖？就係合乎最低質素要求嘅零件。D牌買埋咁多平價零件嚟嵌貨，質素高極有限。」
唔怪得D牌賣得幾平，益消費者噃，只要D牌老早訂下最低質素標準，而呢個標準已可滿足消費者要求嘅話，D牌實在係唔錯嘅選擇。
不過廠家D就叫左丁山選擇A牌或E牌，唔好貪便宜。佢話：「老竇教落，平嘢冇咁好。」