早喺十年前美國嘅漫畫界同電玩界，已興起異形同《鐵血戰士》隻血獸對戰呢個crossover意念。二十世紀霍士睇咗好多個劇本後，終於搵咗《生化危機之變種生還者》導演保羅安德遜（PaulW.S.Anderson）將呢個概念搬上大銀幕。呢套戲嘅名就叫《異獸戰》，下個月頭會喺本地上映。
身為《異形》同《鐵血戰士》超級fans嘅保羅安德遜，原來好早已經有《異獸戰》嘅概念，佢構思出一群科學家連同探險隊伍，出發去南極冰封之地，考究啱啱發現嘅古代金字塔，點知喺裏面發現兩隻外星生物喺度開戰。兩年前霍士睇過個劇本後，決定開拍呢齣電影，監製約翰戴維斯話︰「我哋睇咗超過四十個劇本，只有保羅吸引我哋注意。」
為咗令每個角色都呈現真實感，保羅特登搵嚟《鐵達尼號》金像視覺效果顧問尊般奴（JohnBruno）提供意見，重將電腦特技盡量減至最少，所以喺戲入面有七成嘅效果都係實景，加上利用真人上陣，畀觀眾感受下兩雄對決、拳拳到肉嘅震撼。
保羅拍攝呢套戲亦十分認真，單係製作異形出現嘅場面，已經要用上遙控、繩纜控制、同埋畀演員着嘅異形服飾。如果只係遠距離或短時間拍到異形，就會俾演員着上異形服；但當拍一啲較細微嘅動作，好似異形伸出條脷咁，就會用上遙控異形。