長毛上年區議會選舉，打破咗福建人係蔡素玉鐵票嘅神話，所以民主派喺今次選舉，都好積極去北角搶福建票，好似何秀蘭咁，為咗爭取福建人支持，近日好努力學福建話，至少喺洗樓時，打招呼都會親切啲。
何秀蘭話，佢已經識用簡單嘅福建話介紹自己同拉票。八方聽落都覺得似模似樣，唔知啲福建鄉里會唔會因此而投佢一票？
何秀蘭又澄清話，佢前晚喺西環邨呢個左派地區洗樓，只係得一個居民投訴佢，其實好多市民都知佢有做嘢。
另一方面，大狀梁家傑噚晚繼續去觀塘翠屏邨洗樓，八方初時見佢周身唔自在，覺得好騷擾人哋食飯，重唔小心叫咗啲選民，「十二月九日去投票」，但洗洗吓佢就愈洗愈精神，人未到聲先到，喺條走廊大叫「我係梁家傑，請你投我一票，今日余若薇都嚟埋。」兩位大狀同啲市民傾得好開心，梁家傑一啲都唔似直選新丁，當然洗樓好辛苦，但係都係值得嘅。
傳真︰2623-9278
電郵︰