遠東發展上月以四億七，出售遠東銀行旺角大廈舖位及一個住宅，畀投資者黎永滔，噚日突然公布交易要延期完成，當中涉及由遠展做物業出租代理人一事，重有待決定。
遠展方面解釋，當初嘅買賣協議，有一項條款，係業主向買家保證，首兩年每年約五厘租金回報，即買方每月可收百九萬租。
遠展強調，交易冇大問題，只係律師樓對大額成交處理嚴謹，成交期至由八月延至明年三月。
蘭西記得，物業成交時實際回報約三厘八，計番月租得百五萬，遠展玩「租金保證」，兩年代價約九百六十萬，如果一次過回贈畀買家，等於樓價兩巴仙。
知名人士與普通人一樣，得閒去睇吓樓。今屆落選港姐沈穎婷，剛剛參選完，雖然攞唔到冠軍，但視為大有條件打入娛樂圈。消息人士話，佢噚日偕母親李影與一男性朋友，去睇悅濤軒示範單位，一行三人喺中環售樓處研究咗一陣，好似有興趣買兩間。
長實上個禮拜五開始賣悅濤軒，今個禮拜想集中做花園平台單位，噚日公布呢種單位名為「綠悠雅軒」，全數三十二個，六百九至千二呎，平台花園百七至三百五呎，禮拜六先推四個，以登記洽購方式賣，意向呎價三千二。
蘭西講過，觀塘世紀工商中心地廠，一分為三招租，代理中記李彥樺估計，有一分半回報。𠵱家喺半個月內火速租出，回報達標。
其中二C，千一呎，最早租出，租戶為時裝店，月租一萬八千八；五千五呎二A，由食品零售商以四萬六承租；另家具店用二萬六租三千呎二B。夾埋月收九萬零八百。
買入價七百二十萬，回報一分五厘一，相對之前租予單一租客，回報近一分一，執多好多。
內地物業在港推售，促銷招數層出不窮，𠵱家買內地舖位，喺本港嘅消費支出重可以用嚟供樓，真係前所未聞。
國中控股喺長沙嘅國中星城商舖項目，本港買家只要喺國中指定嘅香港商舖消費，夠一定限額，國中行政總裁陳永源話，會替買家繳付部份供款，上限為舖價嘅1%。
業主可以將商舖交由國中管理，部份租金及營業額收入亦可當作供款，若果生意好，有可能一個仙都唔使供㖭。
國中星城有逾千個商舖，現先推二十七個，面積百五至六百四呎，售價由十幾萬起。
仲量聯行周一公布，幫基金分拆中環皇后大道中九號二十四樓為七個單位出售，幾日就閃電售出兩個，呎價九千二、三，效率奇高。
側聞基金持貨七年，係時候諗吓點做，最終決定出售，問題係全層賣定拆散，仲記事先有兩手準備，搵定買家，經過一番努力，以細單位用家出價較進取，於是業主選取散賣方案。
層寫字樓由律師樓租用至九月，間細需時三個月，所以成交期要年底。最細係七及八號單位，分別七百餘及千四呎，呎價亦最低。待售的一至六號，千五至二千八呎，每呎九千五至一萬零二百。
代理話，皇九叫租二十五、六蚊，回報逾三厘，租客變買家，計落總比存錢入銀行好。
蘭西
電郵地址：
