匿埋一段時間嘅特首董建華噚日去大埔一間老人中心聽老人家唱卡拉OK，今日又會去中學，聽班去完北京修讀國情教育課程嘅學生講心得，唔知阿董係咪諗住老人家會好相與啲，而班去完偉大祖國朝聖嘅學生哥，又會睇在中央份上畀幾分薄面佢。
噚日阿董微服出巡去視察大埔區，到訪多家手袋店、中藥行、時裝店、玉器店同蔬果舖，了解市況，不過就慳住荷包冇幫襯，之後佢去到救世軍大埔長者綜合服務中心探望長者，有長者正舉行卡拉OK下午茶座。
阿董送咗個生果籃畀老人家，但就齋聽冇唱歌，老人家就唱咗首「相識也是緣份」畀佢聽，又送咗幅國畫畀特首。特首又話，雖然五月至七月嘅失業率企穩喺百分之六點九，但政府仍要繼續努力減低失業率。
至於今日阿董去庇理羅士女子中學，教統局局長李國章認真識做，陪住老闆一齊見學生，有咩𠵱郁，都可以護主。
傳真︰2623-9278
電郵︰